Di daxuyaniyên li hemû bajaran hatine dayîn de banga ‘’edalet’’ û ‘’rûbirûbûnê’’ hate kirin.
Xizmên windayan li çar bajaran jî peyama; ‘’Çend sal derbas bibin jî, em ê windayên xwe ji bîr nekin. Heya ku fail werin darizandin em ê lêgerîna xwe ya ji bo edaletê bidomînin’’ dan.
RIHA
Şaxa Rihayê ya ÎHD’ê di hefteya 58’emîn a çalakiya xwe de aqûbeta Bedîrhan Tuysuz ê ku di sala 1979’an de ji aliyê kesên çekdar ên girêdayî Eşîra Bûcak ve hatibû revandin, pirsî. Hevseroka Şaxa ÎHD’ê Songul Arpa diyar kir ku Bedîrhan Tuysuz ji ber ku li hemberî zexta eşîretê stûyê xwe xwar nekir, hedef hate girtin û got: ‘’Tevî ku gundê lê hatî revandin û fail diyar in jî tu lêpirsîn nehatin vekirin.’’ Songul Arpa banga; ‘’Divê daxwaza malbata Tuysuz ya ‘qet nebe bila goreke me hebe’ were bicihanîn’’ kir.
COLEMÊRG
Di çalakiya ku li navçeya Gever a Colemêrgê hate lidarxistin de aqûbeta Haci Ahmet Er ê ku di sala 1995’an de dema di bin çavan de hatiye windakirin, hate pirsîn. Rêveberê ÎHD’ê Eren Baskin, bi bîr xist ku Er li gel birayê xwe hatiye binçavkirin û piştre jî bi tu awayî agahî jê nehatiye wergirtin û got: ‘’Malbata Haci Ahmet Er ev 30 sal in ji bo cihê gorekê li ber xwe dide, lê belê polîtîkaya bêcezahiştinê berdewam dike.’’
AMED
Li Amedê di çalakiya hefteya 870’emîn de, doza Mehmet Salîh Akdenîz ê ku di sala 1993’yan de li herêma Şenê ya Pasûrê di bin çavan de hatî windakirin û 10 gundiyên din hate rojevê. Komîsyona Windayan a ÎHD’ê, bi bîr xist ku Dadgeha Mafên Mirovan a Ewropayê (DMME) di sala 2001’an de Tirkiye mehkûm kiriye lê belê di hiqûqa navxweyî de ceza li tu failan nehatiye birîn. Parlamentera DEM Partiyê Ceylan Akçayê jî got: ‘’Heya ku rûbirûbûn pêk neyê,aşitî jî pêk nayê. Dewlet neçar e ku hesaba kesên winda bide.’’
ÊLIH
Di çalakiya hefteya 706’emîn a li Êlihê de Veysel Atilgan (9) û Meryem Bûlut ên ku di 10’ê Cotmeha 2015’an de li Enqereyê di Komkujiya Garê de jiyana xwe ji dest dane, hatin bibîranîn.
Rêveberê ÎHD’ê Reşît Çetînkaya di çalakiyê de axivî û ev yek anîn ziman: ‘’Dayîka Meryem sembola aşitiyê bû, Veysel biçûktirîn mexdûrê aşitiyê ye. Bi ser de gelek sal derbas bûn lê belê edalet nehate dabînkirin.’’
