Fermandariya Yekîneyên Berxwedana Şengalê bi boneya 7’emîn salvegera êrîşa li ser Xanesorê daxuyaniyek weşand. YBŞ’ê destpêkê hemû şehîdên Xanesorê bi rêzdarî bi bîr anî û soza parastina gel û destkeftiyan da.
Daxuyanî wiha ye:
“Êrîşa ku li ser Xanesorê hatibû kirin, planên dewletên dagirker bû û ew êrîş bi destê PDK’ê çêbibû. Êrîşa Xanesorê, piştî rizgariya Şengalê pêk hatibû. Şengal bi destê keç û lawên vî gelî bi pêşengtiya HPG, YJA STAR û bi hêzên YBŞ-YJŞ’ê hatibû rizgarkirin. Bi tifaqa hêzên derve û bi hinek hawîrdorên cuda çênebibû. Bi temamî bi daxwaz û vîna gel û bi pêşengtiyek serbixwe ev serkeftin bi dest ket. Piştî vê serkeftinê hêdî hêdî hêza gel xwe rêxistinî kir û li ser vî esasî rêveberiya xweser xwe pêş xist. Lê belê dagirkeriyê ev serkeftin tehemûl nekir. Ji xwe êrîş li ser vî esasî pêk anîn. PDK jî, ji bona wê tevgeriya. Pêwîste êrîşa 3’yê Adarê li ser vî esasî em naveroka wê fêm bikin. Bi temamî ev êrîşa bê tehemulî ya li hemberî vîna gel bû. Ji ber ku gava gel rêxistinî be ti hewceyî bi wan nabe. Gelê rêxistinkirî di serî de di asta ewlekarî, çandî û siyasî de serbixwe dibe. Di vê wateyê de hêrsa PDK’ê tê fêmkirin. Ji ber ku bi salane PDK gel dixapîne. Dibêje ‘ez vîna we me ez ewlekariya we me’, lê fermana herî dawî da diyarkirin ku bi vî rengî nîne. Gava DAÎŞ hebû PDK reviya bû, gava ev qad rizgar bû, hîna nû nû kete tevgerê û wesayîtên xwe yên zirxî anî qadên rizgarkirî. Gelê me li hemberî xiyanetê bi bertek bû. Gel û gerîllayên Şengalê bi hev re kete tevgerê. Ji xwe dema mirov li şehadetên ku 3’yê Adarê çêbûne dinêre, mirov dibîne ku xelkê Şengalê bi yek dengî, bi yek dest pêşî li dagirkeriyê girtin. Ji qada civakî heval Nazê, ji çapemeniya azad heval Nûjiyan, ji hêzên leşkerî di serî de bi pêşengtiya berxwedaniya heval Orhan, Çekdar, Çiya, Têkoşîn û bi temamî 12 hevalên me ji bo pêşî li vê dagirkeriya bêbext bigirin, şehîd bûn. Ev encam bersivek tund bû, li dijî dagirkeriyê bertekek mezin bû. Di encam de ev erdnîgarî ji PDK’re nehat hiştin.
Îro jî li pêş perde li paş perde li ser Şengalê gelek bazirganî hene. Gelek caran gefên PDK li ser vê erdnîgariyê çêdibe. Ne tenê gef, plan û hewldanên wan jî çêdibin. Tişta ecêp pişta xwe bi dewleta Tirk germkirin e. Ew dewlet di hemû dîroka xwe de berpirsê gelek fermanên li ser Şengalê ye. PDK baş dizane ku em weke xelkê Êzîdî li dijî dagirkeriya Tirk a Osmaniyan çiqas hesas in. Lê dîsa jî ev hêz dest ji planên qirêj bernade. Dewleta Tirk ji xwe re kiriye weke mamoste û îro jî weke wê li ser navê Êzidî qeyûman dişîne meclîsa Nînowa, sîxurî pêş dixîne û her wiha gelek planên wan ên qirêj hene. Em di ferqa van planên wan de ne. Lê bila PDK baş bizanibe ku ew dema ji bo şer dernekeve, em heya dawiyê bi hesas tevgeriyan û em pir bi baldar bûn. Lê vê carê hemû hewldanên PDK bêyî nîqaş wê bibe sedemê bersiveke tund. Vê carê em ji her demî zêdetir amade ne ku hem gelê xwe hem jî destkeftiyên xwe biparêzin.
Ji destpêka fermanê heyanî roja me ya îro me di vê oxirê de berdelên pir girahbûha ên weke Berxwedan, Mam Zekî, Zerdeşt, Arîn, Bêrîvan, Seîd, Dijwar û Azad û herî dawî heval Sadûnan daye û me xwe ji têkoşîn û armanca xwe ya ku di welatek azad de jiyankirinê, paşde nedaye. Êrîş çêdibin bila bibin, ji kîjan alî ve were bila were em ê heyanî dawiyê di şopdariya van şehîdên xwe yên ku destan nivîsîne de li ber xwe bidin û em ê xeyal û armancên wan pêk bînîn. Me ev soza xwe çawa di roja destpêkê ya ku di şert û mercên herî dijwar de daye, em îro di şexsê şehîdên xwe yên Xanesorê de dubare dikin.
Li ser vî bingehî em şehîdên xwe yên Xanesorê û di şexsê şehîdên xwe yên Xanesorê de tevahiya şehîdên xwe yên di oxira jiyaneke mirovahî, wekhevî û azad jiyankirinê de canê xwe feda kirine, bi rêzdarî bi bîr tînîn û bejna xwe li ber bîranînên wan ditewînîn. Em dibêjin serkeftin di ronahiya van pakrewanên me de, wê bibe ya me û gelê me.”
