Konferansa Yekitiyên Bijîşkî li Herêma Bakur û Rojhilatê Sûriyeyê ku ji bo azadiya fîzîkî ya Rêber Apo vê sibehê bi dirûşma “Tenduristî bingeha pêşketin û rizgariyê ye” li avahiya Zanîngeha Rojava ya Qamişloyê dest pê kiribû, bi dawî bû.
Nûnerên Yekitiyên Bijîşkî li Bakur û Rojhilatê Sûriyeyê, bijîşk, xebatkarên tenduristiyê, nûnerên saziyên tenduristiyê yên Rêveberiya Xweser û nûnerên Tevgera Civaka Demokratîk (TEV-DEM) beşdarî konferansê bûn. Konferans ji aliyê hevseroka Yekitiya Dermanxaneyan a Herêma Bakur û Rojhilatê Sûriyeyê Ebîr Hesaf, hevserokê Yekitiya Bijîşkan a Kantona Cizîrê Mistefa Ebdulkerîm û Dr. Diyar Reşo ve hat birêvebirin.
Konferans bi nîqaşên li ser nirxandinên Rêber Apo dest pê kir. Beşdaran bal kişand ser çareseriyên ku Rêber Apo ji aloziyên civakî û siyasî re pêşkêkêş kirine. Hate gotin, tevî ku Rêber Apo zêdetirî 26 sal bi fîzîkî girtî ye û tecrîdeke giran li ser wê tê meşandin, lê ramanên bi nirx in û ji tevahî aloziyan re çareserî ne.
Beşdaran her wiha îşaret bi rewşa tenduristiyê ya Rêber Apo kirin û girîngiya misogerkirina mafê wî yê wergirtina lênihêrîna tenduristiyê ya berfireh a birêxistinkirinî destnîşan kirin. Beşdaran xwest ku bijîşkên ji Bakur û Rojhilatê Sûriyeyê jî di nav de şandeyên yên navneteweyî yên sebixwe û pispor serdana Îmraliyê bikin û tenduristiya Rêber Apo bişopînin û tedawiyê pêşkêş bikin. Her wiha xwestin rêz li qanûnên navneteweyî yên têkildarî mafên mirovan û tenduristiya girtiyan werin girtin.
Di dewama konferansê de bandorên dirûnî û civakî yên li ser tenduristiya mirovan bi taybetî li herêmên şer, dîsa jî bandorên ku şer li jîngehê dike hatin nîqaşkirin û Sûriyeyê wekî mînak hat nîqaşkirin.
Di konferansê de îşaret bi rola jinan û xebata wan a li hemberî van pirsgirêkan hat kirin. Hate gotin, ezmûna jinên li Bakur û Rojhilatê Sûriyeyê nimuneyek pêşegn a rêvebirina guhertinên siyasî û civakî ne. Hate bibîrxitin ku li Bakur û Rojhilatê Sûriyeyê jin di qadên tenduristî, perwerde û rêveberiyê de li pêş in û rola wan di avakirina civakeke demokratîk a hevgirtî jî hat destnîşankirin. Beşdaran ezmûna jinên li Bakur û Rojhilatê Sûriyeyê wekî bandorên erênî yên li ser tenduristiya giştî û aramiya civakên xwecih pênase kirin û diyar kir ku divê ev ezmûn were pêşxistin û piştgiriya wê bê kirin.
Di dawiyê de pêşniyar û nîqaşên ku di konferansê de dekretine wekî encamname hate destnîşankirin ku ji aliyê Ebîr Hesaf ve hat xwendin.
Di encamnameyê de hate gotin, bijîşkên ji Bakur û Rojhilatê Sûriyeyê jî di nav de divê şandeyeke navneteweyî ya ji gelek branşan pêk tê, serdana Rêber Apo bike û bêyî astengî an jî şertan tenduristiya wî kontrol bike û tedawiyê pêşkêş bike.
Her wiha diyarkirin ku divê mafên bingehîn ên Rêber Apo bi taybetî lênerîna bijîşkî werin mîsogerkirin û wekî beşek ji pêkanîna edaleta û rûmeta mirovahiyê bi fîzîkî were azadkirin. Di dewama encamnameyê de hat gotin ku divê piştgiriya banga aştî û civaka demokratîk a Rêber Apo bi xurtî bê kirin, rê li ber daxuyaniyên nefret û kîndariyê û neteweperestî bên girtin. Hate gotin, divê rêgeza pêkvejiyan û edaleta civakî û mîsogerkirina mafên hemû pêkhateyên Sûriyeyê werin pêkanîn.
Di encamnameyê de peyamên lezgîn ji rêxistinên navneteweyî yên têkildarî mafên mirovan, bi taybetî Rêxistina Tenduristiyê ya Cîhanê, Konseya Mafên Mirovan û Komîteya Mafên Mirovan, rêxitsinên bijîşkî û hiqûqî yên wekî Rêxistina Bijîşkên Sînornenas, Komîteya Pêşîgirtina li Îşkenceyê ya Ewropayê (CPT) hat kirin ku dawî li binpêkirinên li dijî Rêber Apo bînin û zextê li dewleta Tirk bikin bila mercên ragirtinê baş bike û mafê wî yê lênerîna bijîşkî bi cih bîne.
Di encanameyê de girîngiya parastina jîngehê ji bo tenduristiya mirovan hate desntîşankirin. Hate gotin ku divê siyasetên jîngehî yên tendurist werin pêkanîn. Bi armanca rêgirtina li ber nexweşiyan jî hate gotin divê pêngavên hişmendiya tenduristiyê di nava civakê de werin zêdekirin û ev jî mîna gava yekemîn a ber bi spandina hişmendiyeke tendurist a demorkatîk û giştî ve hat şîrovekirin.
