Fermandariya Giştî ya Yekîneyên Parastina Jin (YPJ) bi daxuyaniyeke nivîsekî şehadeta şervana xwe Arîn Serhed (Bahar Ugun) ragihand
Daxuyanî wiha ye
“Di her dever û bajarên welatê me de, cengawer û Rindêxanên ku dîroka gelê xwe nûjen dikin, diwelidin. Ew jinên xwediyê dilên ji pola û bi evin in ku ji ber erkên xwe li hember welat nas kirin e, xwe kirine canbexşên xakê. Carek din dîrok dibe şahidê kesayetên mîna çiyayên asê, kesayetên ku mîna çiyayê Agirî bilind û bedew. Di bîra gelê me û tevahiya cîhanê de, weke neqşek zêrîn dimînin û şop dihêlin.
Bahar Ugun bi nasnav Arîn Serhed, li bajarê Erziromê çavên xwe li jiyanê vekiriye. Ew di nava çanda xwe ya resen û kevnar de mezin û fêrî jiyanê bûye. Li herema Serhedê ku bi dijwarbûn û asêbûna xwe tê nasîn, taybetiyên jina lêgerînvan ku jiyana ji rêzê xwe re napejirîne têde ava dibin. Ev jî dihêle ku rastiyên ku tên jiyîn pir zû ferq bike û ji kûr ve hîs bike. Ji ber welatperweriya malbata hevrêya me Arîn, ew di zarokatiya xwe de şoreşa azadiya Kurdistanê dinase û wiha sempatî û bandorbûyênên hevrêya me li hember şoreşê çêdibe. Di dema ku bavê hevrêya me Arîn xebatên şoreşê dida meşandin ji hêla dewleta Tirk a dagirker ve tê şehîdxistin. Ev dihêle ku hevrê Arîn di temenek biçûk de rastiya dijmin û rastiya mêtînkariyê baş nas bike û li gorî wê jiyana xwe xêz bike. Her wiha bi tevlîbûna birayê hevrêya me Arîn, Rêzan Rûken her ku çû bandorbûyîna hevrê Arîn çêbû û xwesteka wê yê tevlîbûna ji nava refên şoreşê re zêde bû. Li ser vê bingehê di sala 2015’an de, berê xwe dide nava refên şoreşa azadiyê û biryara jiyanek azad dide.
Li qadên Rojavayê welêt bi hemû hêz û potansiyela xwe kar, xebat, şer û têkoşînê dide meşandin. Li her derê û di her demê de bi ruhê şoreşgerî ji her tiştî re amede bû. Hevrêya me Arîn bi dîtina xwe ya ji perwerdeyên bîrdozî û leşkerî re, xwe bi şoreşê re dike yek. Her kêliya jiyana xwe dizivrîne demên têkoşîna ji bo azadiyê û bi dilmeziniyeke tijî têgihiştin, xwe fedayî Rêber Apo, gel û şehîdan dike. Bi zanebûneke kûr li ser bingehê dînamîzma ciwatiyê dibe şervanek jin a jîr û xwe bi ramanên Rêber Apo mezin dike. Hevrêya me Arîn bi wê jîrbûn û fedekariya xwe di pêngavên rizgarkirinê yên ku li Hesekê, Reqa û Dêrazorê çêdibin de, cihê xwe digre. Bi vî awayî dibe xwedî ezmûnên mezin. Hevrê Arîn di nava hevrêyên xwe de bi morala xwe yê şoreşgerî, hestên xwe yên paqij û xeyalên xwe yên mezin ve dihate naskirin. Weke jineke ciwan a têkoşer bi dengê xwe yê xweş ku ji çanda kevnar ê dengbêjên herema xwe Serhed, bi hizirandinên xwe yê kûr û bi rukeniya xwe, li pey xwe mîrasek giranbuha ji ciwanên welatê xwe re hişt. Bi kelecan û heyecana xwe ya ji jiyanê re, xwedî performansek bilind û hêjayî nasînê bû. Ew her di wê hewildanê de bû ku layîqî bav û birayê xwe be, bi taybet ji jêdera hêzgirtina wê birayê wê yê şehîd hevrê Rêzan Ruken bû. Her du xwuşk û bira bi zanebûna hevaltiya rast û di oxira Kurdistanê de bûn lehengên dilwêrek ê şoreşa me.
Di dîroka 3’yê Avrêla 2024’an de, di encama lêdana balafirên keşfê yên dagirkeriya Tirk de li bajarê Kobanê hevrêya me Arîn tev li nava karwanê nemiran dibe. Em wek Yekîneyên Parastin Jin (YPJ) hevrêya xwe Arîn bi şanazî, rêzdarî û bi nirxdayîneke mezin bi bîr tînin û ji malbata hevrê Arîn û tevahiya gelê xwe re sersaxiyê dixwazin û soza tolhildan û pêkanîna xeyalên tevahî şehîdan dubare didin û em ê bi qasî wê baweriya ku gelê me bi me dike derbikevin û her di xeta Rêber Apo û şehîdan de bimeşin.”
NASNAMEYA ŞEHÎD
Nasnav: Arîn Serhed
Nav û Paşnav: Bahar Ugun
Navê Dayik: Ferîde
Navê Bav: Cibraîl
Dîroka Şehadetê: 03.04.2024
