Berxwedêrên kantona Firatê yên li Bendava Tişrîne têkildarî komkujiya ku dewleta Tirk li gundê Berxbotanê yê Kobanê kir, ji ANF’ê re axivîn û diyar kirin ku wê hesab ji sûcdaran bixwazin.
Mahîr Şêxo anî ziman ku ew komkujiya ku li Berxbotanê şermezar dikin û got: “Divê êdî hemû kesên ku navê xwe dikin mafên mirovan bi erka xwe rabin. Em bang li her kesî dikin ku divê êdî li hemberî van komkujiyan rabin ser piyan. Em in xwediyê wê îradeyê, em ê li ber xwe bidin.”
Mahîr Şêxo bi bîr xist ku doh salvegera komkujiya Helebceyê bû, di rojeke bi vî rengî de komkujî li Kobanê hate kirin û got, “Di her rojê de û di dîrokê de gelê Kurd rastî komkujiyan hatiye. Em ê jî li hemberî wan komkujiyan serî hildin û li hemberî dagirkeriyê rabin.”
Xwediyê baxçeyê ku duh ew malbat tê de bi cih bibû û bû hedefa êrîşa dewleta Tirk a dagirker Henîfî Ehmed e got, “Ew kes di baxçeyê min de diman. Ez wê komkujiyê şermezar dikim. Ew di nava razana êvarê de bûn hedef, faşîzma dewleta Tirk ew kirin hedefa xwe. Ew malbat bêyî cih û war bûn, em jî bi wan re bûn alîkar.”
Henîfî Ehmed diyar kir ku zarok, zilam û jin şehîd bûn, tenê du mane ew jî bi giranî birîndar bûne û got, “Em vê yekê şermezar dikin û divê mafê mirovan li hemberî van kiryarên dewleta Tirk a dagirker xwedî helwest be.”
