Rêveberiya Xweseriya Demokratîk a Kantona Firatê têkildarî komkujiya ku dewleta Tirk a dagirker li Kobanê kir û bernameya Newrozê daxuyaniyek da çapemeniyê.
Daxuyanî wiha ye:
“Destpêkê em bi navê Rêveberiya Xweseriya Demokratîk Newroza 2025’an li tevahiya gelê xwe, Rêber Apo, malbatên şehîdan, QSD, YPJ û Hêzên Ewlekariyê Hundirîn pîroz dikin. Hemû şehîdên Newrozê, şehîdên li dijî dehaqên zalim li ber xwe dan ên sedsala 21’emîn bi rêzdarî bi bîr tînin û soza bilindkirina têkoşînê û serkeftina azadiyê didin.
Newroz sembola aştî, yekîtî û jiyana hevbeş e. Ji Kawayê Hesinkar û vir ve ruh û karekterê Newrozê rabûna li ber zilmê ye. Ev yek jî di tevahiya dîrokê de bûye têkoşîna azadiyê ya gelan û bindestan. Agirê Newrozê tirs berda dilê faşîstan, zaliman û hêzên zordar; moraleke mezin da gelê Kurd, dost û alîgirên demokrasiyê.
Weke tê zanîn Newroza îsal ji her salê zêdetir bi coş û kelecaneke mezin wê were pîrozkirin. Di dema rêjîma Baas ku bi salan gelê Kurd bi qirkirin, tunekirin û asîmlasîyonê re rû bi rû mabû de, ev cejn dihat qedexekirin.
Bi heman rengî mebesta dagirkeriya dewleta Tirk ew e ku agirê Newroza Kurdan û agirê azadiyê bi rêya komkujiyan vemrîne. Şevê din dewleta Tirk a dagirker, di berbanga cejna Newrozê, cejna azadiyê de, li gundewarê başûrê Kobanê carek din komkojiyek pêk anî. Di encamê de ji heman malbatê neh kes şehîd ketin û du kes birîndar bûn. Dagirkeriya dewleta Tirk hemû rêbazên qirkirin, talankirin û tunekirinê pêk tine.
Li Kobanê û Bakur û Rojhilatê Sûriyê rojane sûcên şer pêk tên, lê tevî peymana di navbera Mazlum Ebdî û Ehmed El Şera de jî deng ji hikûmeta Sûriyeyê dernaveke. Heta van kêliyan balafirên dewleta Tirk vê herêmê top baran dike.
Em weke gelê Kantona Firatê soz didin ku em ê heta serkeftinê mîrateya têkoşînê ya ku şehîdên me ji me re hiştiye. Ji bo bigihêjin armancên xwe yên avakirina Sûriyeke demokratîk, nenavendî û pirrengî em ê li ber xwe bidin.
Di dawiyê de em wek Kantona Firatê van komkujiyan şermezar dikin û ji ber komkujiyê bernameya Newroza 2025’an a bajaran disekinînin. Em ê tenê li 2 cihan pîrozbahiyan çêbikin.
Bernameya Newrozê wê bi dirûşmeya, “Azadiya fizikî ya Rêber Apo misogeriya Sûriyeya Demokratîk e” roja 19’ê Adarê li Eynîsayê û 21’ê Adarê jî li Girê Miştenûr ê Kobanê bi coşek mezin were pêkanîn. Pîrozbahî wê saet di 10’an de destpê bikin.
Em bang li tevahî gelên xwe dikin ku bi ruhê Newrozê û berxwedanê dakevin qadên Newrozê.”
Daxuyanî bi dirûşmeya “Şehîd Namirin” bidawî bû.
