Komeleya Rojnamevanên Jin a Mezopotamyayê (MKG) “Rapora Binpêkirinên Mafên Rojnamevanên Jin” a meha Mijdarê eşkere kir. Di beşa nirxandinê ya raporê de hate gotin ku zextên li ser çapemeniya azad û rojnamevanên jin roj bi roj zêde dibin, rojnamevan dema ku pîşeya xwe dikin, ne tenê bi binpêkirina azadiya ramanê re rû bi rû dimînin, di heman demê de bi cudakariya zayendî, tundî û gefan re rû bi rû dimînin. Hat gotin ku ev zext hem azadiya pîşeyî ya rojnamevanan û hem jî mafê gel a xwe gihandina agahiyên rast dixe xeterê.
Di berdewamiya daxuyaniyê de wiha hate gotin: “Binçavkirin, serdegirtina malan, gefxwarin, muameleya xerab û hewldanên sansurê yên li dijî rojnamevanan di Mijdara 2024’an de gelekî zêde bûne. Bi taybetî du serdegirtina mala nûçegihana JINNEWS’ê Derya Ren a li Semsûrê, lêdana polîsan a nûçegihana JINNEWS’ê Pelşîn Çetînkaya ya li Êlihê dema nûçe dişopand û li Stenbolê Hîlal Koylû bi darê zorê dest ji karê xwe berda, ev mînakên şênber ên herî berbiçav in.
Di vê pêvajoyê de Seroka Komeleya Rojnamevanên Jin a Mezopotamyayê Roza Metîna jî di 26’ê Mijdarê de hatibû binçavkirin. Di serdegirtina malan de her wiha rojnamevan Tûgçe Yilmaz, Suzan Demîr, Havîn Derya, Berfîn Atli û Serap Guneş jî hatin binçavkirin. Ev operasyonên li dijî rojnamevanan ne tenê xebatên wan ên pîşeyî dike hedef, di heman demê de êrişek li dijî têkoşîna jinên rojnamevan a ji bo hebûna jiyana civakî ye.”
Di berdewama raporê de wiha hate gotin: “Hedefgirtina rojnamevanan êrişeke zayendî ye û armanc jî ew e ku jinan ji jiyana civakî dûr bixin. Tundiya fîzîkî û psîkolojîk, gef û zextên darazê yên ku li ser rojnamevanan tên kirin, bi cudakariya zayendî re jî her ku diçe kûrtir dibe. Ev hawirdora zextê ya li dijî çapemeniya azad armanc dike ku dengê rojnamevanan bibire û rê nede ku heqîqet di civakê de were ragihandin. Pêwîst e demildest ev binpêkirin bên rawestandin, rojnamevan karibin bi ewlekarî pîşeya xwe bikin û ji bo wekheviya zayendî pêk were gav bên avêtin. Divê kiryarên şîdeta fîzîkî û psîkolojîk ên li hemberî rojnamevanan bên darizandin û hemû pêkanînên ku azadiya çapemeniyê asteng dikin bên rawestandin.
Weke Komeleya Rojnamevanên Jin ên Mezopotamyayê em careke din tekez dikin ku em ê li kêleka rojnamevanên li dijî zextan li ber xwe didin bibin. Dengê rojnamevanan nayê qutkirin; ronahiya rastiyê tu carî nayê tarî kirin. Em bang li raya giştî dikin ku piştgiriyê bidin rojnamevanên jin û Çapemeniya Azad a Kurd.”
Di raporê de binpêkirinên li dijî rojnamevanan wiha hatin rêzkirin:
“* Rojnamevanên êriş li wan hatine kirin: 3
* Rojnamevanên bi ser mala wan de hat girtin: 8
* Rojnamevanên hatin binçavkirin: 9
* Rojnamevanên mûameleya ne baş li wan hat kirin: 4
* Rojnamevanên gef li wan hat xwarin: 5
* Rojnamevanên şopandina wan a nûçeyan hat astengkirin: 3
* Rojnamevanên der barê wan de lêpirsîn hat destpêkirin: 7
* Rojnamevanên der barê wan de doz hat vekirin: 7
* Rojnamevanên darizandina wan dewam dikin: Di 14 dosyeyan de 38 rojnamevan hatin darizandin
* Hejmara rojnamevanên girtî (Ji 4’ê Çileya 2023’yan heta niha): 5
* Malperên hatine girtin: 1
* Nûçeyên hatine astengkirin: 6
* Naverokên Medyaya Dîjîtal ên hatine astengkirin: 3
* Lutfiye Burcu Kara – Rojnameya Yekitiya Têkoşînê
* Elîf Ersoy – Berpirsiyara Karên Nivîsê ya Kovara Yuruyuşê
* Hatîce Duman – Midûra Karên Nivîsan û Xwediyê Rojnameya Atilimê
* Selamet Turan – Rojnamevan
* Ozden Kinik – Xebatkara TRT’ê
