Aktîvîsta Tevgera Jinên Azad (TJA) Yagmur Yurtsever ji ajansa me re axivî û diyar kir ku tundiya li hemberî jinê tenê bi êrişên şexsî û fîzîkî nikare bê nirxandin û işaret bi koka tundiyê kir. Yagmur Yurtsever anî ziman ku tundiya mêr û tundiya dewletê ji hev cuda nîne, herdu jî xwe ji sîstema bi serweriya mêr xwedî dike.
Bi dewamî ragihand ku şerê heyî yê li cîhanê diqewime jî berhemek ji serweriya mêr e û bandora polîtîkayên şer ên li ser jiyana civakî û tundiya li jinê bi vî rengî vegot: “Her ku tundiya mêr mezin bû, şer jî mezin bû. Her ku şer mezin bû, tundiya mêr jî gihîşt asta şer. Çi bû? Veguherî rengê DAÎŞ’ê. Jin bi kêrê, bi fîşekan hatin kuştin, serê wan hate jêkirin. Ev hemû qewimîn. Ew tundiya mêr a weke ‘sivîl’ hate nîşandan, bi esasî veguherî şêweyekî şer ê emperyalîst û dewletê.”
Yagmur Yurtsever bi bîr xist ku dirûşma ‘Jin, Jiyan, Azadî’ bûye dirûşma herî mezin a jinan a li cîhanê û destnîşan kir ku jinan bi vê têkoşînê têkiliya navbera dewlet, şer, mîlîtarîzm û serweriya mêr raxistin pêş çavan.
Her wiha anî ziman ku tundî tenê bi kuştin û êrişa fîzîkî nikare bê pênasekirin û ragihand ku her cûre astengiyên li pêşiya daxwaz û îradeya jinan şêweyekî tundiyê ye, mekanîzmayên dewlet û dadgeriyê jî li şûna astengkirina tundiyê wê xwedî dike.
Lewma jî diyar kir ku têkoşîn nabe ku tenê ji jinan re bê hiştin û got, eger mêr dixwaze weke ‘bibe welatiyekî rast û li nava civakeke wekhev bijî’, divê li dijî tundiya mêr helwesteke zelal nîşan bide û derfetê pêşkêşî piştevaniya jinê bike.
Yagmur Yurtsever qala danîna çekan û nîqaşên li ser demokratîkbûnê jî kir û destnîşan kir ku demokrasî tenê mafê hilbijartinê nîne, divê sîstemeke welê bê avakirin ku jin ji qada xwecihî heta bi navendê li ser jiyana xwe û siberoja welêt karibin biryarê bidin.
Aktîvîsta TJA’yê bi bîr xist ku ji pêncî salên dawî yên Tirkiyeyê sih sal bi lêgerîna li çareseriyê derbas bû, lê belê her carê ev pêvajo xitimî û anî ziman ku sedema bingehîn a vê xitimînê tecrîdkirina Rêber Apo bû. Yagmur Yurtsever got, “Di her pêvajoyê de me dît ku li gel îradeya gelan û hêviya aştiyê jî rê û rêbaza sereke ya qedandina pêvajoyê girtina deriyên Îmraliyê ye. Divê bê destnîşankirin ku astengiya herî mezin a li pêşiya hêviya jiyana bê şer a civakê ev tecrîd e. Lewma her mirovekî ku ji baweriya bi desthilatdariyê fikaran dike, divê bi gotina ‘Wê demê bila tecrîda li Îmraliyê bi dawî bibe, mercên ragihandin, karkirin û siyasetê yên Birêz Ocalan bêne afirandin’ xwe nîşan bide.”
Yagmur Yurtsever bi bîr xist ku Rêber Apo di pêvajoyên muzakereyê de azadî û wekheviya jinan weke ‘pîvana esasî’ daniye ser maseyê û ev nêzîkatî weke ‘hevrêtiyeke sosyalîst’ a gelekî xurt pênase kir. Yagmur Yurtsever got, “Em vê yekê weke meseleya hevrêtiyeke xurt û dustûra sosyalîst pênase dikin. Dibe ku neheqî be ku mirov bibêje wê lîderekî şoreşger bi tena serê xwe pirsgirêkeke gelekî mezin a civakî biqedîne. Tevgear jinê bi afirandina rêxistiniya civaka xw,e parastina xwe û rêxistiniya xwe dikare bersiva bê bibîne. Lê belê ev hevrêtî ji bo me gelekî baş e. Em qala hevrêtiyeke welê dikin ku destketiyên me îro dibe ser wê maseyê ku Komar jinûve tê nîqaşkirin. Ev jî gelekî hêja ye.
Yên ku li vî welatî dibêjin ew dewleta me ne, bi navê me siyasetê dikin, hebûna jinê qebûl nakin. Lê belê lîderê gelê Kurd vê yekê weke şertekî, weke pîvaneke esasî datîne ser maseyê. Divê bersivek ji vê piştevaniyê re bê dayin.”

