Hevserokê Giştî yê DEM Partiyê Tuncer Bakirhan û heyeta ku ji Berdevka DEM Partiyê Ayşegul Dogan, Serokwekîlê Koma DEM Partiyê Sezaî Temellî û Cigirê Hevserokên Giştî yê ji Rêveberiyên Herêmî berpirsyar Mehmet Rustu Tîryakî pêk dihatin, ji ber biryara ‘bêhukmiya teqez’ li meclîsê serdana koma CHP’ê kirin.
Tuncer Bakirhan û heyeta pê re li koma CHP’ê bi Serokê Giştî yê CHP’ê Ozgur Ozel ku ji peywîrê hatibû dûrxistin re hevdîtin kirin. Di hevdîtinê de Serokwekîle Koma CHP’ê Murat Emîr û Cigirê Serokê Giştî yê CHP’ê Sezgîn Tanrikulu cih girtin. Piştî hevdîtinê heyeta DEM Partî û CHP’ê daxuyanî dan.
Di serî de Ozgur Ozel axivî û bi lêv kir ku meclîs niha ji navenda giştî ya CHP’ê re malîvaniyê dike û wiha axivî: “Em li vir kar û xebatên xwe jî didomînin. Me îro serdaneke pir bi nirx jî qebûl kir. DEM Partî ku piştî CHP’ê partiya herî zêde xwedî kursî li meclîsê, serdana me kir. Em spasiya serdanê dikin.”
Tuncer Bakirhan, jî anî ziman ku hevdîtina wan bi erênî derbasbûyê û ev tişt anî ziman: “Bi biryara bêhukmiya teqez siyaseta Tirkiyeyê careke din di krîzê de ye. Dîmenên duh ên ku bi darê zorê polîs ketin hundirê navenda giştî ya CHP’ê şermeke mezin bû. Em vê êrîşê şermezar dikin û qebûl nakin. Her ku bê hiqûqî mezin bû cudakariya di nava civakê de jî zêde dibe. Divê em xwedî li demokrasiyê derbikevin. Sedema vê rewşê kêmbûna demokrasiyê ye. Xilasiya vê rewşe jî ew e ku rejîm demokrat bibe û hiqûq pêk were.
Li dinayayê geşedanên girîng diqewimin. Divê Tirkiye di vê pêvajoyê de enerjiya xwe ji bo krîzên siyasetê xerc neke û aştiya civakî mayinde bike. Rêya wê jî edalet û hiqûq e. Dema edalet û hiqûq nebe aştiya civakî jî bi awayekî bandor dibe. Em hêvî dikin CHP’ê di vê pêvajoyê de hevpariya xwe biparêze û bi awayekî serkeftî di nav xwe de çareser bikin.
Helwesta me şênber e. Partiyek divê ne bi destê darazê, bi destê xwe û vîna xwe diyar bike. Em tu mudaxaleyeke derve rewa nabînin. Em di wê baweriyê de ne ku CHP’ê dikarê vê pêvajoyê bi kongreyeke demokratîk derbas bike. Em careke din selametiyê dixwazin.”
