Bi boneya 44’yemîn salvegera Berxwedana Rojiya Mirinê ya Mezin a 14’ê Tîrmeha 1982’yan gaziyên Rojava Qehreman Têkoşer û Zarîn Kobanê nêrînên xwe anîn ziman.
Qehreman Têkoşer di destpêka axaftina xwe de tevahî şehîdên azadiyê bi bîr anî û got, “Di salên 1980’an de darbeya faşîst a 12’ê Îlonê li Zindana Amedê ya bi piranî kadroyên Tevgera Azadiyê de tê de bûn, polîtîkayên herî bêrehm kiribûn dewreyê. Bi armanca wê teqez encam bigirin bi awayekî bêperwa êrîş dikirin. Girtiyên ku ji bilî can û bedena wan tiştekî pê li ber xwe bidin nebû, yan wê serî tewandibana yan jî wê mirin dabana ber çavan û agirê berxwedaneke bi rûmet pêxistibana. Wan hevrêyan tişta layiqî xwe hilbijartin û biryara berxwedanê dan. Ev berxwedan îro ji zindanan bigire, li çiyayan û hemû qadên têkoşînê bûye rêûresmeke bi heybet a bi fikir û felsefeya Rêber Apo tê hûnandin. ”
Qehreman Têkoşer wiha domand, “Wan hevalên me yên bi qasî di oxira wê de bimirin ji jiyanê hez dikirin, ji azadî û rizgariyê yeqîn dikirin. Bi çalakiya xwe jî ev piştrast kirin. Di pêşengiya Rêber Apo de li ser esasê bîranîna wan hevrêyan Tevger û gelekî qet têk naçe û timî di azadiyê de bi israr e hat avakirin.”
Gazî Zarîn Kobanê jî destnîşan kir ku berxwedan û çalakiya Rojiya Mirinê ya Mezin a 14’ê Tîrmehê di pêvajoyeke ku li hember gelê Kurd û pêşengên Tevgera Apoyî, teslîmiyet, xiyanet, înkar û tinekirin dihat ferzkirin de berxwedana mirovatiyê bû û got, “Bi vê çalakiya esîl a dîrokî re rûmeta mirovatiyê bi ser ket. Berxwedana hevalan tenê bi Zindana Amedê ve sînordar nema. Di serî de Rêber Apo, tevahî hevalên din ketin nav hewldana ku ev berxwedana mezin veguhere têkoşîneke wê bi salan bidome.”
Zarîn Kobanê anî ziman ku 14’ê Tirmehê tê wateya bûyîna xwedî nasname û ev anî ziman, “Van hevrêyan di nav rewşeke pir zor û zehmet de nîşan dan ku mirov dikare bi berxwedanê bi ser bikeve. Vê berxwedanê agirê têkoşîna bi rûmet gur kir. Bi hezaran jin û xortên Apoyî bi îlhama ji vê berxwedanê girtin, di pêşengiya Rêber Apo berê xwe dan çiyayan.”
Zarîn Kobanê bal kişand ser Pêvajoya Aştî û Civaka Demokratîk û got, “Hewce ye em bi ruhê berxwedana 14’ê Tîrmehê xwedî li pêvajoya di pêşengiya Rêber Apo de pêş dikeve derkevin. Ji bo pêkanîna xetal û hêviyên şehîdan hewce ye em bi rola xwe ya dîrokî rabin.”
