Berxwedana 223 karkerên Şaredariya Bajarê Mezin a Wanê yên ku ji aliyê qeyûm ve ji kar hatine avêtin, bi meş, çalakiyên rûniştinê û zincîrên mirovan didome. Bi pêşengiya Platforma Ked û Demokrasiyê ya Wanê, Konfederasyona Sendîkayên Şoreşger (DÎSK) û Genel-Îşê ji Parka Feqiyê Teyran heta avahiya DÎSK’ê meşiyan û zincîra mirovan pêk anîn.
Di meşê de pankarta “Em li dijî zilma qeyûman xwedî li kar û keda xwe derdikevin; karker wê vegerin, qeyûm wê biçin” hilgirtin û gelek caran dirûşmeyên “Qeyûmê diz ji Wanê bicehime” û “Karker li vir in, qeyûmê diz li ku ye?” hatin berzkirin. Hevşaredarê Bajarê Mezin ê Wanê Abdullah Zeydan ê qeyûm şandin şûna wî, parlamentera Colemêrgê Oznûr Bartin, gelek nûnerên rêxistinên civaka sivîl û gel beşdarî çalakiyê bûn. Li ser navê karkeran Atakan Aşkan daxuyanî xwend.
‘223 KARKER WÊ BIMÎNIN, QEYÛM WÊ BIÇIN’
Atakan Aşkan diyar kir ku ew ê li hember qeyûman paşve gav neavêjin û got: “Em 223 karker in. Me bi salan ked, xwêdan û jiyana xwe ji bo vî bajarî terxan kiriye. Me erka xwe bi rûmetî bi cih aniye. Me ne dizî kiriye û ne jî talan kiriye; piştevaniya me ked û rûmeta me ye.
Em karker in, zarokên vî bajarî ne. Lê hûn rêveberiyeke neqanûnî û biyaniyê gel in. We karê me desteser kiriye û çav bera keda me daye. Eniya me zelal e, rûyê me paqij e.
Cihê me di wijdanê gel de heye. Em bi ked û rûmeta xwe li vir in. Hûn ê biçin; em ê bi ked, berxwedana xwe û gelê xwe re bimînin.”
‘GEL DI 31’Ê ADARÊ DE BERSIVA PÊWÎST DA’
Parlamentera Colemêrgê Oznur Bartin di çalakiyê de axivî û got, “Ev rewş deh sal in didome. Gel di 31’ê Adarê de bi 14-0 şaredariyan qeyûm û polîtîkayên wî ji holê rakirin. Îro em dîsa bi heman rewşê re rû bi rû ne. Yên ku îradeya gel desteser kirine, wê di demek nêzîk de nizanin bê çawa reviyane.
Yên ku tehemulî encamên hilbijartinê nekirin, hewl didin hêrsa xwe li ser gel bibarînin. Lê em dizanin ku îradeya gel wê vê zilmê jî bişkîne. Gel di 31’ê Adarê de li ser sindoqan bersiv da komployê. Polîtîkayên qeyûman didomin, lê divê AKP bizanibe ku demokrasî û pêvajoya aştiyê bi qeyûman nayê avakirin.”
Karkerên bi meşê hatin ber avahiya KESK’ê, bi çepikan dawî li çalakiya xwe anîn.
