DMME’yê îtiraza meha derbasbûyî ya Tirkiyeyê red kir, ku Tirkiyeyê xwest, biryara li ser Hevserokê Giştî yê berê yê Partiya Demokratîk a Gelan (HDP) Selahattîn Demîrtaş li Daîreya Mezin a DMME’yê jinûve bê nirxandin. Bi vî rengî biryara DMME’yê ya binpêkirina mafê Demîrtaş tekez bû.
Partiya Demokrasî û Wekheviyê ya Gelan (DEM Partî) li ser hesabê xwe yê medya dîjîtal têkildarî mijarê daxuyaniyek da. Di daxuyaniyê de hate gotin, “Divê gelek biryarên DMME’yê yên heta niha li ser Selahattîn Demîrtaş, Fîgen Yuksekdag û gelek hevalên me hatine dayin li ber çavan bêne girtin, biryara herî dawî ya 8’ê Tîrmeha 2025’an a DMME’yê ya ku tekez bûye li ber çavan bê girtin û bêyî derengmayinê bêne berdan.”
Selahattîn Demîrtaş jî piştî tekezbûna biryara binpêkirinê ya DMME’yê li ser hesabê medya dîjîtal daxuyaniyek da û got, “Merheba, biryara DMME’yê bêguman girîng e û ji aliyê hiqûqî ve diyarker e ku divê bi cih bê anîn. Lê belê ne tenê ji bo me, ji bo 86 milyon welatiyên me, ‘hiqûqa xwişk û biratiyê’ ya navbera me ji her tiştî hêjatir e. Hiqûqa xwişk û biratiyê jî bi gavên civakî, aborî û hiqûqî dikare xurt bibe ku jiyana me ya bi hev re ya aştiyane, bi edalet, azad û wekhev bi hêz bike. Divê mesele ne bi têgehên têkbirin, têkçûn, kîn, tolhildanê bêne nirxandin, divê bi têgehên paşeroja hevpar û aqlê hevpar bêne nirxandin.
Bi hêviya ku her gava bê avêtin xizmetê ji aştiyê, aramiyê re bike, bi hêviya ku di rojên azad de bigihêjin hev, silav û hezkirinên xwe dişînim.”
