Hevberdevka Desteya Rêveberiyên Xwecihî ya Demokratîk a Partiya Demokrasî û Wekheviyê ya Gelan (DEM Partî) Canan Kepenç ji ANF’ê re axivî.
Kepenç anî ziman ku DEM Partî li şaredariyan ji bo jinan gelek karî dike û destnîşan kir ku bi kampanya bi dirûşma ‘Gotina me neqediya ye, em ê tundiyê rawestînin’ ew dixwazin bajarên welê ava bikin ku jin lê azad bin.
‘DIXWAZIN SÎSTEMA ME YA HEVSEROKATIYÊ KRÎMÎNALÎZE BIKIN’
Kepenç anî ziman ku desthilatdarî nikare xwe li vê xwedîderketina gel a li sîstema hevserokatiyê rabigire û destnîşan kir ku şaredariya Êlihê ji ber vê yekê hate desteserkirin.
Kepenç diyar kir ku sîstema hevserokatiyê destketiyeke ji têkoşîna wekhevî û azadiyê ya jinan a bi salan e û got, “Yek ji hêmanên bingehîn ên paradîgmaya me ya demokratîk, ekolojîk û azadîparêziya jinê ye. Têkoşîna wekhevî û azadiyê ya jinan di şexsê sîstema me ya hevserokatiyê de şênber bûye, lewma timî bûye hedef û hewl hatiye dayin ku bê krîmînalîzekirin. Êrîşên ku heman piştî pêvajoya pêşhilbijartinê destpê kir û heta niha dewam dikin, parçeyek ji vê yekê ye. Xelkê Êlihê di hilbijartinên xwecihî yên 31’ê Adarê de bersiva herî bedew da van êrîşan. Hevşaredara me ya Êlihê Gulistan Sonuk di hilbijartinên xwecihî yên Tirkiyeyê de bi dengê herî bilind hate hilbijartin.”
‘SÎSTEM HEVSEROKATIYÊ LI HEMBERÎ XWE WEKE GEFEKÊ DIBÎNE’
Kepenç got, “Jin ku hîma bingehîn a têkoşîna salan e, bi nêzîkatiya; heta ku jin azad nebe civak azad nabe tevgeriyan” û anî ziman ku sîstema hevserokatiyê rewşa şênber a têkoşîna azadî û wekheviyê ya civakî ye. Kepenç bi vî rengî dewam kir, “Sîstemeke welê ye ku li gel jinan civakê azad dike û di heman demê de nêzîkatiya desthilatdarîparêz a seriya mêr parçe dike. Di bingeha êrîşa desthilatdariyê ya li ser sîstema me ya hevserokatiyê de ev yek heye. Sîstema me ya hevserokatiyê li hemberî xwe weke gefekê dibîne û ji ber vê yekê jî bi mekanîzmayên şerê taybet, bi zordariyê, bi rêya hiqûqê êrîşî sîstema me dike. Mekanîzmaya ku ev desthilatdarî herî zêde êrîşê dibe ser ew mekanîzma ye ku wê herî zêde civakê azad bike.”
‘EM Ê BAJARÊN WELÊ AVA BIKIN KU JIN LÊ AZAD BIN’
Canan Kepenç destnîşan kir ku armanca wan avakirina wan bajaran e ku jin karibin bi rengekî wekhev û azad lê bijîn û qala karên li şaredariyên xwe kir: “Destpêkê li şaredariyan hemûyan; li şaredariyên bajarên mezin me serokatiyên daîreyên jinê, li bajar û navçeyên din jî midûriyetên jinan ava kirin. Bi rêya van saziyan me hewl dan beriya her tiştî pêşî li tundiyê bigirin. Dİ demeke kurt de li serokatiyên daîreyên jinê û midûriyetên jinê me xeta ‘alo tundî’, navendên piştevaniya jinê, navendên jiyanê yên jinê, stargehên jinê, kreş vekirin. Bi dirûşma ‘Gotina me neqediya ye, em ê tundiyê rawestînin’ dest bi kampanyayeke ji bo salekê kirin. Armanca me di vir de ew e ku li dijî tundiya li hemberî jinê têbikoşin. Em dixwazin derfetê biafirînin ku jin karibin bi hêsanî xwe bigihînin mekanîzmayên têkoşîna li dijî tundiya li jinê û bi vî rengî tundiyê asteng bikin. Dawiya dawî jî em dixwazin bajarên welê ava bikin ku jin lê azad bin.”
