Endamê Fermandariya Giştî yê QSD’ê Cemîl Kobanê, li Qada Şehîd Egîd ya bajarê Kobanê bi tevlîbûna hezar welatiyên Kobanê axaftinek kir.
Kobanê derbarê êrîşên çeteyên dewleta dagirker a Tirk, HTŞ û DAÎŞ’ê yên li ser Rojava de daxuyanî da û diyar kir ku wekî hemû gelan, dema azadiya gelê Kurd hatiye û ev tişt ragihand:
“Îro, wekî her gel û neteweyekê, dema azadiyê hatiye. Di nava gelan de azadiya gelê Kurd wê bibe pêşengiya azadiya gelek kêmneteweyan. Çawa ku li Sûriye, cîhan û Rojhilata Navîn Kurd, Suryanî, Çerkez û Ermenî rastî înkar û îmhayê hatine, berxwedana gelê Kurd wê ji bo hemû gelên ku dixwazin bi azad bijîn bibe çavkaniya îlhamê. Têkoşîna ku em îro dikin têkoşîna vê ye; ji ber vê yekê em li ber xwe didin. Armanca berxwedana ku me ji Dêra Hafir heta Dêra Zorê meşand ji bo çi bû? Gelek dost û welatparêzên me vê gava paşde ya ku me avêtiye tam fêm nakin; rastî û heqîqeta wê nizanin. Hêzên navneteweyî û planên wan ên navneteweyî, nêzîkatiya wan a ji bo Sûriyeyê, tenê bi vê re eleqeder e.”
Cemîl Kobanê, êrîşa qirkirinê ya ku li ser Rojava tê meşandin, wekî berdewamiya komployên mezin ên hêzên mezin li Rojhilata Navîn bi nav kir û wiha got: “Îro, hêzên mezin hewl didin li Rojhilata Navîn dewletek mezin di binesaziya xwe de ava bikin. Ferq nake Kurd, Ereb an neteweyek din bin. Wan nas nakin; îradeya wan û hebûna wan nas nakin. Ew hewl didin li Rojhilata Navîn dewletek mezin ava bikin. Wekî ku me berê jî got, mixabin gelek dost û gelek hêz vê rewşê ku ku berdewamiya komploya li Rojhilata Navîn e, bi temamî fêm nakin. Ji ber vê yekê, di berxwedan û şoreşê de wekî me tevnagerin, cuda difikirin. Hin ji wan pişta xwe dane hêzên derve, hin ji wan jî pişta xwe dane hinek hêzên herêmî. Bi vî rengî hewl didin hebûna xwe îfade bikin.”
Kobanî diyar kir ku bûyerên dawî nîşan didin ku ji xeynî Kurdan tu dostên Kurdan nînin û wiha berdewam kir: “Wekî me got, îro komployeke navneteweyî heye. Li dijî van êrîşên ku li ser gelan tê meşandin, bêdeng in. Gelên ku ji bo azadiyê têdikoşin, ji nedîtî ve tên. Lê pir baş dizanin hêzên ku li kêleka me bi me re têkoşiyan timî digotin, ‘Şervanên Kurd qehreman in, şervan in.’ Lê ji ber ku îro berjewendiyên wan cuda ne, bêdeng, bêhest, ker û kor dimînin. Em wekî şoreşger û hevrê, pir baş dizanin ku dostê em yê heq dîsa em in. Dostê Kurdan Kurd bi xwe ne. Hêzên ku êrîşî YPG û YPJ’ê dikin parçeyek ji vê projeyê ne.”
Endamê Fermandariya Giştî ya QSD’ê Cemîl Kobanî diyar kir ku şerê ku niha li Rojava tê meşandin wê ne tenê bi Sûriyeyê re sînordar bimîne, Îran û Iraq jî di nav de hemû herêmê bigire nava xwe û got ku şerê niha ku hatiye destpêkirin, destpêka Şerê Cîhanê yê Sêyemîn e û wiha got, “Berê DAÎŞ, El Nusta û Ahrar eş Şam hebû. Ev îradeya xwe firotin û teslîmî berjewendiyên hêzên derve bûn. Îro jî ji bo pêkanîna projeyên hêzên derve wekî çekekî xizmetê wan dikin, pêşengiya van hêzên derve dikin. Ev şer wê tenê bi Sûriye, Iraq û Îranê re sînordar nemîne. Divê em vê baş bizanibin ku li pêşiya me şerekî pir mezin heye. Em vê wekî Şerê Cîhanê yê Sêyemîn bi nav dikin. Şerê ku niha em di nav de ne destpêkek nû ye, di çarçoveya Şerê Cîhanê yê Sêyemîn de di navbera hêzên derve û hêzên neteweyî de bi filî destpê kiriye”
