Cenazeyê şervanên Hêzên Sûriyeya Demokratîk (QSD) Tofan Belîk (Elî Şahîn) û Şêx El Cebel (Mustefa Eerbûş) ên 26’ê Tîrmeha 2025’an di encama qezaya trafîkê de şehîd bûbûn, bi merasîmekê li Goristan Şehîd Dîcle ya li başûrê Kobanê hatin veşartin. Bi sedan ji malbatên şehîdan, sazî û dezgehên Rêveberiya Xweser û gelê Kantona Firatê tevlî merasîmê bûn.
Merasîm bi rêzgirtina ji bo giyanê şehîdan dest pê kir. Di merasîmê de ewilî Rêveberiya Desteya Jin a Kantona Firatê Macîde Hesûn axivî. Macîde Hesûn anî ziman ku ew bi saya berxwedana bêyî hempa ya şehîdan îro li virin û got: “Şehîd Tofan û Şêx El Cebel bi lehengî li eniya Qereqozaxê û Bendava Tişrînê li ber xwe dan.”
Endamê Meclîsa Leşkerî a Kantona Firatê Îsmaîl Mihemd Elî jî axivî. Îsmaîl Mihemd Elî bilêv kir ku ew di pêvajoyek girîng re derbas dibin û wiha got: “Divê em timî xwedî vê sekna niha bin û li hemberî dagirkeriyê serî hildin. Em weke meclîsa leşkerî soza xwe nû dikin û dibêjin, em ê heta dawiyê xwedî li şehîdan derkevin û li ser rêya wan bitêkoşîn.”
Li ser navê Malbata şehîd Tofan Belîk, Celal Şahîn axivî û soza şopandina rêya şehîdan da. Celal Şahîn got ku şehîdan soz dabûn û layiqî soza xwe derketin.
Dû re jî hevriyê şehîd li ser hevrêyê xwe yê şehîd stran got. Pişt re ji aliyê meclîsa malbatên şehîdan ve wesîqeya şehîdan hat xwendin û radestî malbatên şehîdan hat kirin.
Cenazeyê şehîdan bi dirûşmeyên “Şehîd namirin” hatin veşartin.
