Ji aliyê Komîsyona Ziman, Çand û Hûnerê ya Stenbolê ya Partiya Wekhevî û Demokrasiyê ya Gelan (DEM Partî) ve bi şîara, “Rewşenbîr û Hûnermend Diaxivin” bi sernavê “Ji bo bîranîna dilê ku xwe daye aşitiyê Sirri Sureya Onder” panelek hate lidar xistin. Hevserokê Giştî yê DEM Partiyê Tuncer Bakirhan jî tevlî panelê bû û got: “Pêvajoya aşitiyê ne tenê ji aliyê aktorên siyasî ve were avakirin. Wê ji aliyê hemû dînamîkên civakê ve were avakirin.”
Bakirhan anî ziman ku ji roja ku ev pêvajo dest pê kir, ew li qadê ne û wiha axivî: “Li heft herêmên Tirkiyeyê em aştiyê, şertên wê û derfetên wê bi gel re nîqaş dikin. Ti mafê me yê ku em şaştî an jî kêmaniyan bikin tine ye. Ji ber ti telefiya vê pêvajoyê nîn e.”
Bakirhan di axaftina xwe de cihekî girîng ji bo Sirri Sureyya Onder veqetand û wiha dom kir: “Ji bo aşitî û xwîşk-biratî tevahî jiyana xwe da. Ji zindanan heta kolanan, ji qadan heta meclîsê timî li ba gel bû. Helwesta wî helwesta rewşenbîr e. Di dema herî zehmet de li gel bindest û kedkaran cih girt.”
Bakirhan anî ziman ku aşitî erka herkesî ye û wiha pê de çû: “Bi zanabûn, werekî û kombûnê heger em kevirek nikarin deynin vê pêvajoyê, ti wateya tiştê ku em xwediyê wê ne nîne. Heger em bikaribin aşitiyê ava bikin wê hemû Tirkiyê qezenc bike, em ê hemû qezenc bikin.
Bakirhan destîşan kir ku di çavkaniya qeyranên Rojhilata Navîn de rejîmên antî-demokratîk û yekperest hene û wiha got: “Ev rejîm derveyî êş tiştekî ji gelan re neanîn. Heta ku pergalên demokratîk neyên avakirin wê ev qeyran bidomin.”
Bakirhan anî ziman ku li Tirkiyê nîqaşên aşitiyê girîng in û ev tişt li ser axaftinên xwe zêde kir: “Li ber serê me şer didomin û em aşitiyê nîqaş dikin. Ev seknekê birûmet e. Aşitiyê axivîn bi hûner, gotin û notayê aşitiyê avakirin e. Aşitî gihîştina kilama Şakiro û Neşet Ertaş e.”
Bakirhan anî ziman ku aşitî ne tenê karê aktorên siyasî ye û wiha domand: “Rast e, alî aşitiyê didin dest pê kirin, lê yê ku wê mayînde bike gel e, rewşenbîr e, hunermend e û bindest e. Divê hemû beşên civakê rîsk bigire ber çavan. Heger em vê têkoşînê bi hev re mezin bikin, em ê serbikevin.”
Bakirhan diyar kir ku gotinên li dijî aştîyê, yên ku hewl didin gelan li hemberî hev bikin dijmin, ji aliyê kêmîneyeke piçûk lê rêxistinkirî ve têne xwedîkirin û wiha got: “Li Tirkiyeyê kêmîneyeke piçûk vê pêvajoyê piştgirî nake. Ew li dijî vê pêvajoyê derdikevin. Dibêjin ev pêvajo wê welat parçe bike. Ez nizanim aştî li ku derê welatek parçe kiriye, lê nijadperestî belayeke wisa ye ku nêzîkatiyên ku rûniştina li ser maseyê jî wekî parçebûna welat dibînin derketine holê û hewl didin xwe birêxistin bikin.”
Bakirhan got ku eger niha ji bo aştîyê pênûsên xwe, gotinên xwe û rengên xwe derneynin, em ê kengê derxin? û axaftina xwe bi van gotinan bi dawî kir: “Ev berpirsyariyeke dîrokî ye. Em dikarin bi hev re aştî û demokrasiyê bînin vî welatî. Wekî din, em ê bi hev re winda bikin.”
