Cenazeyên şervanên Hêzên Sûriya Demokratîk (QSD) Gîvara Efrîn û Mazlûm Şehba yên ku di êrîşa balafira bêmirov a dewleta Tirk a dagirker de, li herêma Tirwaziye ya rêya navneteweyî ya M4’ê di 19’ê vê Nîsanê de şehîd bûn, li Helebê hatin veşartin. Bi sedan şêniyên taxên Şêxmeqsûd û Eşrefiyê yên Helebê li pêşiya Nexweşxaneya Şehîd Xalid Fecir kom bûn û bi karwanekê cenazeyên her du şervanan ber bi Goristana Şehîdên Berxwedana Taxên Şêxmeqsûd û Eşrefiyê birin.
Li goristanê rêvebera Meclîsa Malbatên Şehîdan a Helebê Zinarîn Efrîn axivî û got, xwedîderketina li bîrat şehîdan erka tevahî civakê ye, ji nav wan jî malbatên şehîdan.
Fermandarê Hêzên Ewlekariya Hundirîn Zagros Heleb jî bi navê Hêzên Ewlekariya Hundirîn soza domandina rêya şehîdan heta pêkanîna serkeftinê dubare kir.
Apê şehîd Gîvara Efrîn, Ehmed Elîko bi navê malbata şehîd axivî û diyar kir ku serkeftinên li Bendava Tişrînê û Şêxmeqsûd hatine pêkanîn, bi saya fedakarî û têkoşîna şehîdan in.
Ehmed Elîko banga xwedîderketina li destkeftiyên şehîdan û şopandina rêya wan ji bo avakirina welatekî demokratîk û azad kir.
Di dawiya merasîmê de wesîqeyên şehadetê yên her du şehîdan hatin xwendin û cenazeyên wan bi tilîliyên dayikan û dirûşmêeyên “Şehîd namirin” hatin veşartin.
