Fermandariya Navendî ya Amerîkayê (CENTCOM) daxuyaniyek li ser hesabê xwe yê X’ê weşand. Di daxuyaniyê de bîlançoya ji Tîrmeha îsal (2025) û vir ve ya operasyonên li Sûriyeyê yên li dijî DAIŞ’ê hat aşkerakirin.
Di daxuyaniyê de hate diyarkirin ku hêzên Amerîkayê, bi hevkariya hêzên hevkar, ji Tîrmehê vir ve nêzîkî 80 operasyonên leşkerî li dijî çeteyan pêk anîne ku bermahiyên DAIŞ’ê jî di nav de hene.
Li gorî daxuyaniyê, çeteyên DAIŞ’ê îsal amadekarî dikir ku bi kêmanî 11 plan an jî êrişan li dijî berjewendiyên DYA’yê pêk bînin.
CENTCOM’ê daxuyand di operasyonên hêzên DYA’yê yên 6 mehên borî de 119 çeteyên DAIŞ’ê hatin girtin, 14 jî hatin kuştin.
Di daxuyaniyê de hat bibîrxistin ku di Îlona îsal de hêzên DYA’yê operasyoneke serdegirtinê li Sûriyeyê pêk anî. Di encamê de serçete Omer Ebdulqadir hat kuştin ku plangeriya êrişan li dijî DYA’yê dikir.
Fermandarê Fermandariya Navendî ya Amerîkayê, Amîral Brad Cooper got, operasyonên li Sûriyeyê elementek girîngji bo pêşîgirtina li vegera şiyanên çeteyên DAIŞ’ê û gefên çeteyan in.
Cooper destnîşan kir ku di meha borî de, hêzên Amerîkî zêdetirî 15 depoyên çekan ên çeteyên DAIŞ’ê li başûrê Sûriyeyê rûxandin û zêdetirî 130 topên hawanê û roket, tifing, mayînên dij-tank û madeyên ku di çêkirina teqemeniyên destçêkirî de têne bikaranîn îmha kirin.
Fermandariyê di dewama daxuyaniyê de bi bîr xist ku hêzên Amerîkayê di Tîrmehê de li bajarê Babê yê gundewarê Helebê operasyonek pêk anîbû, di encamê de serçeteyê DAIŞ’ê Diya Zobai Mislih El Herdanî û 2 kurên wî hatin kuştin.
