Rêber Apo di 28`ê Kanûnê de ji bo tevahiya ciwanan peyamek şand û di peyamê de qala girîngiya rola ciwanan a di avakirina civakeke sosyalîst ya demokratîk de kir. Ciwanên Kantona Firatê têkildarî peyama Rêber Apo ji ANF`ê re axivîn.
Rêveberê Tevgera Ciwanên Şoreşger ya Kantona Firatê Şevger Azad diyar kir ku ciwan dînamîkên civakê ne û ev yek anîn ziman: ‘’Peyama ku Rêber Apo ji bo me şandiye, weke talîmatekê ye û em ê wê talîmatê di jiyana xwe ya rojane de pêk bînin. Em vê nameyê bi dilgermî û kelecaneke mezin silav dikin. Weke ciwanan em ê naveroka peyama Rêberê me daye ku dibêje divê ciwan xwe û civaka xwe bi rêxistin bikin, pêk bînin û rola xwe ya sereke bilîzin.”
Şevger Azad piştre anî ziman ku ew ê bi ciwantiyê bigihîjin jiyaneke sosyalîst demokratîk û got: ‘’Em weke ciwanan xwe berpirsyar dibînin, em ê li dora Rêberê xwe kom bibin û heta dawiyê jî xwedî li wê fikrê derkevin. Em ê azadiya fîzîkî ya Rêber Apo ji xwe re esas bigrin û ji bo wê têbikoşin.’’
Berdevka Tevgera Ciwanên Şoreşger ya Kantona Firatê Firyal Mistefa jî anî ziman ku ew ê li dora Rêberê Apo kom bibin, ji bo azadiya fîzîkî ya Rêber Apo têbikoşin û got: ‘’Rêberê me gotiye ku ‘Me bi ciwantî dest pê kir û em ê bi ciwantî jî ser bikevin.’ Weke ciwanan em ê jî li ser vê xetê têkoşîna xwe bidomînin. Em ê heta dawiyê jî li dora Rêberê xwe bin, em ê dîwarê Îmraliyê hilweşînin û em ê azadiya fîzîkî ya Rêberê xwe misoger bikin. Bi destê ciwanan wê civakeke azad, demokratîk û sosyalîst were avakirin. Em ê dîwarê Îmraliyê hilweşînin û Rêberê xwe bi fîzîkî azad bikin.”
