Konferansa “Jin bi hev re li ser paşerojê diaxivin” bi beşdariya zêdeyî 500 jinan li Odeya Endezyarên Înşaetê ya Enqereyê destpê kir. Di konferansê de ku jinên aktîvîst, akademîsyen, siyasetmedar, nivîskar û rojnamevan li hev civiyan, sernavên aştî, edalet, welatîbûna wekhev, zayendiya civakî û rêxistinbûn tê nirxandin.
Beriya konferansê dayika Îpek Er Hîkmet Kilinç axivî û di doza têkildarî mirina keça xwe de daxwaza edaletê nû kir. Hîkmet Kilinç nerazîbûn nîşan da ku kujerê keça wê hate berdan û ji parlamenteran xwest ku dozê bişopînin.
Hîkmet Kilinç destnîşan kir ku wê dest ji lêgerîna li mafê keça xwe bernede û got, “Ez bang li parlamenterên me yên Kurd dikim ku xwedî li mafê keça min derkevin. Suleyman Soylû ku kujerê keça min diparêze, kir ku kujer beraaat bike. Bila xwîna keça min li erdê nemîne. Heta ku sax bim ez ê li mafê keça xwe bigerim. Heta bi Dadgeha Mafên Mirovan a Ewropayê ez ê şopdarê vê dozê bim. Yên ku hêza dewletê bi kar tînin keça min kuştin. Heta ku kujerê keça min li derve bigere wê edalet bi cih nehatibe.”
Hîkmet Kilinç ragihand ku şeş sal in ew l edaletê digere, sozên di vê demê de jê re hatin dayin bi cih nehatin anîn û got, “Şeş sal in ji min re gotin, eger tu ji partiya Kurdan dûr bikeve em ê edaleta keça te pêk bînin. Piştî şeş salan kirin ku beraat bike. Min her tiştên xwe firot, hatim Êlihê. Bi bahaneya parastina mafê keça min ez xapandin. Keça min îro careke din qetil kirin.
Keça min bi kar anîn, xapandin, tirsandin. Bi gotina ‘Em ê bavê te bikujin, xwişk û birayên te bikujin’ tirsandin. Hewl dan Îpek bifiroşin. Porên Îpek nîşaneya êşkenceyê ye. Kincên bi xwîn ên keça min hîn bi min re ye.”
