Meclîsa Dayikên Aştiyê li Şaxa Komeleya Mafên Mirovan (ÎHD) a Amedê daxuyanî da û rewşa li Meclîsê vegot. Dayika Aştiyê Nezahat Teke nerazîbûn nîşan da ku di komîsyonê de daxwaza axaftina bi Kurdî hate redkirin û got, “Eger nasname û zimanê min nebe, wê demê hîna jî hebûna min nayê qebûlkirin. Eger pirsgirêka Kurd were çareserkirin, divê destpêkê zimanê dayikê bibe zimanê fermî, bibe zimanê perwerdeyê.”
Nezahat Teke bang li Serokê Meclîsê Nûman Kurtulmuş kir ku bi samîmî be û xwest ku ji bo çareseriyê zimanê dayikê weke zimanê fermî û perwerdeyê bê qebûlkirin.
Dayikek din Sultan Bozkurt jî diyar kir ku ji ber bi Tirkî zêde nizane, nekariye xwe baş îfade bike û bal kişand ser girîngiya naskirina “mafê hêviyê” ya ji bo Rêber Apo. Sultan Bozkurt ev tişt got, “Her cure heqaret û zordarî li zimanê me hate kirin. Em dewleteke ku demokrasî û mafên mirovan nas dike, dixwazin. Em dewleteke mîna dewleta Tirkiyeyê naxwazin.”
Havva Kiran jî diyar kir ku dewlet tehemûlê Kurdî nake û ragihand ku ji bo aştiyê divê edalet, demokrasî û zagona bingehîn bi rengê ku hebûna Kurdan qebûl bike were guhertin. Hava Kiran wiha got: “Em edalet û demokrasiyê dixwazin. Di têkoşîna ji bo xwîn nerije tê meşandin de, weke dayik em ê berpirsyariya xwe bi cih bînin. Xwîn bi xwînê nayê şûştin, xwîn bi aştiyê tê şûştin. Hingî ku temenê me têrê bike, em ê aştiyê bixwazin.”
