Rêxistina Mafên Mirovan a Îranê li ser xwekuştina çalakvanê siyasî yê Kurd ê ji Rojhilatê Kurdistanê agahî parve kirin.
Di raporê de hat diyar kirin ku Mustafa Qasemi Hasanvand, çalakvan û girtiyê siyasî yê berê yê xelkê bajarê Eleşter ê ser bi parêzgeha Luristanê, li ber avahiya Komîseriya Bilind a Penaberan a Neteweyên Yekbûyî (UNHCR) ya li herêma Behirka ya Hewlêrê, ji ber bêhêvîbûna ji pêvajoya penaberiyê û nebûna piştgiriya qanûnî dawî li jiyana xwe aniye.
Li gorî heman raporê, Mustafa Qasemi ku berê di girtîgeha Xoremabad û navendên Îstîxbarata Îranê (Îtîlaat) de rûbirûyê êşkenceyên giran ên laş û derûnî bibû, di dema mana xwe ya li Herêma Kurdistanê de gelek caran serdana nûnertiya NY kiribû da ku karûbarên wî yên penaberiyê bilez bikin. Lê belê piştî ku daxwazên wî li pey hev hatin redkirin û zextên derûnî li ser çêbûn, wekî nerazîbûnekê dawî li jiyana xwe anî.
Hêjayî gotinê ye ku berê jî bûyereke wiha li ber heman avahiyê qewimî bû, ku tê de penaberê siyasî “Behzad Mehmûdî” agir berda bû laşê xwe.
Rêxistinên mafên mirovan berê jî hişyarî dabûn ku dirêjkirina pêvajoya nirxandina dosyayên penaberiyê û mercên giran ên jiyanî û derûnî, zextên mezin li ser penaberên siyasî yên li Herêma Kurdistanê çêdikin.
