Roja 10’ê Îlona 2025’an fîlma sînemayî ya ‘Zeviya Hişk û Esmanê Dûr’ hate pêşandan. Fîlmê ‘Zeviya Hişk û Esmanê Dûr’ di Festîvala 5’emîn a Fîlman a Silêmaniyê ji 7 xelatan 5 xelatan wergirt. Têkildarî girtina xelatan û bexşandina ji bo Gerîlayên Azadiya Kurdistanê Derhêner Hewraz Mihemed ji ajansa Rojnewsê re axivî.
Derhêner Hewraz Mihemed got: “Fîlmê me di bingeh de li dijî şer e, hest bi mirovbûn, Kurdbûn û ew êşên ku daxwaz tê kirin ku rojekê bi dawî bibin. Fîlma me li ser wê yekê ye ku êdî dayîk negirîn. Bikarin bibin civakek li Rojhilata Navîn bi hev re bijîn.”
Herwaz Mihemed xelata derhêneriya herî baş girt û vê pêşkêşî Gerîlayên Azadiyê û girtiya siyasî Werîşe Mûradî ya li ber darvekiriyê ye kir. Li ser vê Hewraz Mihemed ev anî ziman: “Dema mirov xelatekê digire divê di ramanên xwe de rast be, di salên dawî de diyariya herî xweşike min girtî. Gelê Kurd pir aştiyê dixwazin, ji bo aştî pêk were sembolîk jî be çek şewitandin. Ji bo wê min xelata xwe diyarî gerîlayên azadiyê kir. Her wiha gelek çalakvan û hunermend ji ber xebatên xwe li nava girtîgehê ne, yek ji van ya herî diyarker jî Werîşe Muradî û hevalên wê ne, ez vê diyariyê pêşkêşî wan jî dikim. Ji ber ku ji bo aştî û azadiyê li ber xwe didin.”
Derhêner Hewraz têkildarî naveroka fîlmê xwe jî got: “Naveroka fîlmê me mirovbûn û Kurdbûn di asta herî bilind de destnîşan kir. Salên dawî ji ber krîzên heyî di pêşxistina karê hûnerî de astengiyên mezin hene û paş ketiye. Kertên taybet jî tenê ji bo qezenca zêde kar tê kirin. Dema wisa jî bû bihayê hûnerî û rasteqîne ya doza mirov dernakeve. Me li ser bingehê xeta sînameya azad fîlma xwe çêkir. Di berhemên azad de ramanên azad derdikeve. Ev jî dike ku bi awayeke rast bibînî û rast bidî nîşandan.”
Hewraz Mihemed anî ziman ku rêya sînemaya azad rêyeke hêsan nîne û destnîşan kir ku karê hûnerî pêwîstî bi aboriyeke zêde ya madî, mirovî û menewî heye.
Derhêner Hewraz Mihemed diyar kir ku festîval û fîlm hev temam dikin û da xuyakirin ku pêwîstî bi fîlmên wiha, kurte fîlm û belgefîlman heye ku li nav xwe bên hilberandin.
DI 5 BASKAN DE HÊJAYÎ XELATÊ HATE DÎTIN
Fîlmê ‘Zeviya Hişk û Esmanê Dûr’ di van kategoriyan de xelat wergirt:
* Derhênerê herî baş
* Filmê herî baş
* Sînematografiya herî baş
* Aktorê herî baş ê mêr
* Aktorê herî baş ê jin
