Desteya Tenduristiyê ya Kobanê bi daxuyaniyekê ragihand ku di destê wan de derman gelekî kêm bûne û dikin biqedin. Daxuyanî li pêşiya Nexweşxaneya Kobanê hat dayîn.
Hevserokê Desteya Tenduristiyê ya Kantona Firatê Ehmed Mehmûd daxuyanî xwendin û got: “Îro 13`ê Sibatê ye, ev 25 roj e bajarê Kobanê ji aliyê hikumeta demkî ve hatiye dorpêçkirin. Pêdiviyên jiyanê derbasî bajarê Kobanê nabin. Dermanên ji bo nexweşiyên cuda derbasî bajarê Kobanê nebûne. Em spasiya gelê xwe yê li Bakurê Kurdistanê dikin, di heman demê de jî AMC, MDM û Xaça Sor dikin ku alîkariya me bi beşeke biçûk a dermanan kir, lê ew jî têra bajarê me nake.
Li Kobanê gelek koçber hene, niha jî bajar rastî pêleke nexweşiyê ya mezin hatiye, dermanên heyî jî têrê nakin. Derman gelekî kêm bûne. Hin nexweş jî hene ku divê berê xwe bide nexweşxaneyên din ên pispor, wekî nexweşiyên penceşêrê. Dermanên îltîhaba kezebê hemû xilas bûne. Dermanên emeliyatê gelekî kêm bûye. Dermanên wekî yên şekir, dil û tansiyonê, ji ber kêmbûna wan em gelekî astengiyan dikişînin.
Ji ber qutbûna avê û vexwarina ava bîran, heta niha 2 hezar kesan ji ber nexweşiya jehrîbûnê serdana nexweşxaneyê kiriye, ew jî di navbera koçberan de pir zêde bûye. Ji ber dorpêçê jî derman li ser bajar qut bûne. Em bi hêvî ne ku demildest ev dorpêç rabe û hemû derman derbasî bajar bibin, hin teknîkên me yên testên nexweşiyê jî hene, lê ew jî xerab bûne. Ji ber qutbûna kehrebeyê jî cîhaz şewitîn. Ji lew re jî divê demildest dorpêça li ser Kobanê rabe.”
