Foruma “Jiyana azad û wekhev avakirina garantiya civakeke komînal û demokratîk e” ku ji aliyê Meclisa Jinan a PYD’ê ve hatiye birêxistinkirin, li Hola Semerqend a taxa Til Hecer a bajarê Hesekê dewam dike.
Piştî axaftina berdevka Meclisa Jinan a PYD’yê Horiya Şemdîn, mijara yekemîn bi sernavê “Kujerê Kastîk di Manîfestoya Azadî û Civaka Demokratîk de” ji aliyê hevseroka Meclisa Têkiliyên Dîplomatîk a Bakur û Rojhilatê Sûriyeyê Nurşan Hisên ve hat pêşkêşkirin. Nurşan Hisên wiha got: “Kujerê kastîk koka zimanî ya peyva ku tê wateya “kast”, zilm û wêrankirin, pênase kir. Dema ev têgeh di asta siyasî û îdeolojîk de tê sepandin, ew ne tenê wêrankirina fîzîkî, di heman demê de wêrankirina derûnî, çandî û exlaqî jî dihewîne”.
Nurşan Hisên nîşan da ku kujerê kastîk di wêjeya akademîk an siyasî ya klasîk de xuya nake û têgîna civaka kujerê kastîk wekî têgînek metaforîk di nava rexneyên Rêber Abdullah Ocalan de li ser xwezaya şaristaniya dewlet-esas, zîhniyeta baviksalar û kolonyalîzmê bi pêş ketiye.
‘BANDORA KUJERÊN KASTÎK LI SER CIVAKÊ HEYE’
Nurşan Hisên her wiha bal kişand ser çarçoveya dîrokî ya ku wate dide têgehê, bi êrişa destpêkê ya li ser jinan bi riya hilweşandina civaka dayiksalarî dest pê dike. Wê bêtir lêkolîn kir ka kolonyalîzm çawa, bi analîzek li ser “parçekirina navxweyî ya laşê reş ji hêla nihêrîna spî ve”, niha di nav gel de dixebite. Şerma ku mirov ji bo zimanê xwe hîs dike û qutbûna ji bîra xwe, bandorên vê “kujerê kastîk” in.
‘PERGALA NETEWEDEWLETÊ XWE JI KUJERÊ KASTÎK AVA DIKE’
Nurşan Hisên wiha anî ziman: “Bi heman awayî, amûra îdeolojîk a dewleta netewe ya nûjen ferd veguherandiye ezezîtiyek ku ketiye xizmeta desthilatdariyê, bi riya wê kujerê kastîk eslê ferdî ji wê dizîne û wî vediguherîne hilgirê pergalê, ji bilî tundiya teqlîdkirina neolîberal ku kujerê kastîk di formên aboriya balkişandinê, teqlîdkirin, çanda ekranê û manîpulekirina algorîtmîk de tê de temsîl dibe.”
‘AZADÎ, WEKHEVÎ Û EDALET NE TENÊ TÊGEHÊN TEORÎK E’
Mijara duyemîn ku bi sernavê “Çareseriyên siyasî û civakî ji bo bidestxistina wekhevî û edaletê”, ji aliyê hevseroka Partiya Yekîtiya Demokratîk Perwîn Yûsif ve hat birêvebirin û wiha got: “Rêber Abdullah Ocalan nêrînek berfireh pêşkêş dike ku li ser 3 stûnên sereke ye. Komîna dayiksalarî, hêzdarkirina jinan û modernîteya demokratîk ku rê li ber civakek yekgirtî vedike, dikare bi mîrateya zordariyê re rû bi rû bimîne. Rêbertî bawer dike ku azadî, wekhevî û edalet ne tenê têgehên teorîk in, rêbazên pratîkî ne dikarin ji bo ji nû ve avakirina civakê li ser bingehên beşdar û demokratîk werin bikaranîn, di heman demê de rêz li cihêrengiya etnîkî, olî û çandî digirin.”
‘KOMÎN KEVIRÊ BINGEHÎN E’
Perwîn Yûsif di berdewama axaftina xwe de bal kişand ser girîngiya komînan û wiha got: “Têgeha komîna daiyksalarî kevirê bingehîn ê ramanên Rêber Abdullah Ocalan e. Ew civakê wekî yekîneyek li ser wekhevî û edaletê ava bûye dibîne. Komînên dayiksalarî yên kevnar ne tenê formeke civakî ya destpêkê bûn, modelên pêşketî yên rêxistina civakî bûn ku her endam mafên xwe dixin bin temînatê û beşdarî biryardayînê dibûn, bi vî awayî çerxa dîrokî ya îstîsmarkirinê ya ku hêzê bi pere û bandorê ve girê dide dişikandin.”
‘RÊBER ABDULLAH OCALAN EDALET JI QADA DESTHILATÊ VEGUHERAND QADA JIYANA WEKHEV’
Perwîn Yûsif di berdewama axaftina xwe de wiha anî ziman: “Rêveberiya Xweser tevî dijwariyên ku pê re rû bi rû dimîne, îro edalet, di eslê xwe de, ne li ser girtina heman tiştî ji her kesê ye, li ser dayîna derfeta jiyana bi rûmet ji her kesê re ye û li ser avakirina têkiliyan li ser rêzgirtinê ye, ne li ser bindestiyê. Bidestxistina edalet û wekheviyê ne pêşnûmeyek qanûn an qonaxeke siyasî ye, riyeke berdewam a rizgariyê ye. Ramanên Abdullah Ocalan ji me re pusûleyek rewşenbîrî peyda kirine ku edaletê ji qada desthilatdariyê ber bi qada jiyanê, ji zimanê mafan ber bi pratîka azadiyê ve dibe.”
Li gorî bernameyê forum dê bi encamnameyekê bi dawî bibe.
