Pîrozbahiya li Qada Eskî Kasaplarê bi girseyî pêk hat. Dirûşmên “Bijî Berxwedana Rojava” û “Bijî Serok Apo” hatin qîrîn. Di pîrozbahiyê de girseya gel demeke dirêj govend gerand.
Hevşaredarê Milazgirê Ahmet Kenan Turker li pîrozbahiyê axivî û diyar kir ku gel bi daxwaza azadiyê qada Newrozê dagirtiye û xwest, şer bi dawî bibe. Turker destnîşan kir ku cihêrengî dijminatî nîne, lê dewlemendiya herî mezin a gelan e.
Parlamentera Mûşê Sumeyye Boz jî destnîşan kir ku agirê Newrozê îsal ji bo aştiyê hate dadan.
Sumeyye Boz anî ziman ku ji Milazgirê heta bi Enqereyê li hemû qadên Newrozê gel xwedî li banga Rêber Apo derket û daxwaza azadiyê tenê li qadan nema.
Parlamentera Sumeyye Boz ragihand ku li hin bajaran kesên agirê Newrozê dadan ketin ber lêpirsînê, nerazîbûn nîşanî vê yekê da û got, eger di lêgerîna çareseriyê de ji dil bin, bila “mafê hêviyê” bi cih bînin.
Sumeyye Boz destnîşan kir ku gelê Kurd dixwaze Rêber Apo di nava xwe de bibîne û got, “Aliyekî pêvajoyê tecrîdkirî ye, aliyê din azad e. Ev yek nayê qebûlkirin.”
Piştî axaftinan agirê Newrozê hate dadan û hunermend Emerxan û Servet Bîrhat hunera xwe pêşkêş kirin.
