Di 8’ê Çileya 2025’an de dest bi berxwedaniyê hat kirin, gel ji Bakur û Rojhilatê Sûriyeyê, ji bo av û kehrebeya xwe ber bi Bendava Tişrînê ve ketin rê. Destpêkê li Kobanê, gel li qada Şehîd Egîd li hevdû kom bûn, bi alên QSD’ê dîlana xwe ya serkeftinê gerandin. Dîlaneke mezin bû, ji zarokên temenê biçûk heta extiyarê ku temenê xwe ji 85 salî jî derbas kiribûn, ber bi bendavê ve çûn.
ÇIMA BENDAVA TIŞRÎN?
Piştî berxwedaniya Kobanê ya sedsalê û têkçûna terora DAÎŞ’ê û rizgarkirina Kobanê, şervanên ji hemû pêkhateyan berê xwe dan wan herêmên ku rizgarî dixwestin. Li wir dest bi hemleyan kirin. Bendava Tişrînê jî di hemleyekê de sala 2016’an ji aliyê şervanan ve hat rizgarkirin. Bendava Tişrînê beşekî mezin ê xaka Bakur û Rojhilatê Sûriyeyê bi enerjî û av dike, ew yek ji mezintirîn bendavan e ku li ser asta Sûriyeyê ye û xwedî girîngiyeke gelekî mezin e.
Dewleta Tirk a dagirker û çeteyên wê êrîşî Bendava Tişrînê kirin, eger bendav bibata hilweşandin, wê heta bi sînorê Iraq û gelek bajarên din jî bida ber xwe û bi xwe re xirabûneke dîrokî ango komkujiyeke mirovî pêk bianiya. Di encamê wê komkujiyê de wê bi hezaran kes ji ber lehiyê jiyana xwe ji dest daban. Lewra jî gelên ji Bakur û Rojhilatê Sûriyeyê biryar dan ku ber bi bendava Tişrînê ve bikevin rê.
Li ser riya Bendavê ango piştî dîlana ku li qada Şehîd Egîd bi dawî bû, komvoya yekem a ji gelê Kantona Firatê pêk dihat ber bi bendavê ve bi rê ket. Li ser riyê rastî bi dehan top û balafirên şer hatin. Lê gel bi îradeyê li ber xwe dan û ber bi bendava xwe ve bi rê ketin.
Piştî ku komvoya gel bajarê Sirînê derbas kir, dewleta Tirk û çeteyên wê êrîşên xwe girantir kirin, vê carê rasterast komvoy dihat hedefgirtin. Êrîşekî ne normal li gel dihat kirin. Lê komvoy ranewestiya û heta bi bendava Tişrînê ve çûn, beriya ku bigihêjin bendava Tişrînê jî, li ser çarriya ku êdî wê gel derbasî bendavê bibe, raste rast êrîş êdî li erebeyên nobedaran dihat kirin, di encama wan êrîşan de gelek şehîd û gelek birîndar jî çêbûn. Bi balafirên rêya bendavê jî hate bombebarankirin û rê xira bû. Dayikan li wir dest bi tilîliyan kirin, gel kevir kom dikirin û li cihên ku balafirê lêdabû, bi cih kirin. Lê dîsa jî wesayîtan nekarîn derbas bibin.
Di wan êrîşan de bi dehan kes birîndar bûn. Lê tevê yekê ji birînên xwe bixwe pêçan û berê xwe didan bendavê û li wir bûn nobedar. Di wê demê de êdî gel ew biryar da ku erebeyên xwe li pey xwe bihêlin û bi meş ber bi bendavê ve bikevin rê. Bendav nêzî 10 kîlometre dûrî wan bû. Dayîkekê bi tililiyên xwe got, ‘Em ji mirinê mezintir in’.
Extiyaran jî digotin ‘Ev bendava me ye’. Gel piştî meşa dirêj gihîştin bendavê û li wir bendava xwe hembêz kirin.
Dayikan bi feraseta şerê gel ê şoreşgerî di qada ceng û berxwedanê de xwarin, paqijî, nan û qatmeyên ser sêlê ji bo berxwedêrên Bendava Tişrînê, şervanên QSD û YPJ’ê amade dikirin.
Gel li Bendava Tişrînê dîrokeke nû nivîsand, dîlana ku ji qada Şehîd Egîd destpê kir, li bendavê temam kirin. Her kes li dora agir kom bibûn, stran digotin, li aliyê din dîlan digerandin. Dahola cengê lê dida û berxwedana Bendava Tişrînê bi ser ket.
