Endama Meclîsa Ciwanan a HDK’ê Eda Kalafat, ji ANF’ê re axivî û diyar kir ku ciwanên Kurd piştî banga ‘Aştî û Civaka Demokratîk’ a ku Rêber Apo di 27’ê Sibatê de kiriye, li Kurdistan û Tirkiyeyê giranî dane xebatên xwe. Eda Kalafat, anî ziman ku li her deverê banga civaka demokratîk tên xwendin, civîna ciwanan û gel tên lidarxistin.
Eda Kalafat, destnîşan kir ku ciwanên piştî komploya navneteweyî hatine dinê, di bin zexta modernîteya kapîtalîst, polîtîkayên şerê taybet, newekheviya aborî û asîmîlasyonê de dijîn û got ku bi taybet jinên ciwan dibin hedefa êrîşên şerê taybet. Eda Kalafat, da xuyakirin ku banga Rêber Apo di van şert û mercan de ronahiyek hêviyê diyarî wan kiriye.
Eda Kalafat, da zanîn ku piştî banga Rêber Apo di nava ciwanan de coşa xebatê mezin bûye û got ku di navbera 1 û 4’ê Nîsanê de ji Amed heta Amarayê meşek hate lidarxistin û peyama Rêber Apo ji ciwanan re hate parvekirin. Eda Kalafat got, “Ji aliyekî ve me daxwaza xwe ya ji bo azadiya fîzîkî ya Rêbertî li her cihî anî ziman; li aliyê din me li navendên bajaran pankart daliqandin; Me poster û berhemên etîketê kir. Em diyar dikin ku yek ji şertên pêwîst ên avakirina wekhevî û azadiyê jî azadiya fîzîkî ya Rêbertî ye.”
HIN JI XEBATÊN CIWIANAN BI VÎ RENGÎ NE:
• Komîsyona Ekolojiyê ya Binevş bi pêşengiya Koordînasyona Jinên Ciwan de hate damezrandin. Ciwan beşdarî Festîvala Çandî û Xwezayî ya jin bûn.
• Bi pêşengiya Meclîsa Ciwanên HDK’ê konferansa Ciwanan û Civaka Demokratîk” di 15-16’ê Hezîranê de li Okmeydanî bi beşdariya 13 rêxistinên cuda hate lidarxistin.
• Di çarçoveya kampanyaya “Em di jiyana sosyalîst de israr dikin, bi Rêbertiya azad re xwe birêxistin dikin” de gelek civînên ciwanan hatin lidarxistin.
• Bi nîşandana belgefîlma “Vejîna Kurd” hişmendiya dîrokî hate bilindkirin.
• Bi pêşengiya komîsyonên çand û hunerê û platforma “Şiyar Be” ya li dijî madeyên hişber a li Amed hatî damezrandin, li gelek deveran çalakiyên nobetê hatin lidar xistin, kon hatin danîn, li ser girîngiya civaka demokratîk nivîs hatin xwendin û pêşbirkên zanînê hatin lidar xistin.
• Di pêşengiya Jinên Ciwan ên HDK’ê de li ser keda jinê ya ku nayê dîtin nîqaş meşandin, di pêşengiya Jinên Ciwan ên DEM Partiyê de jî di çarçoveya kampanyayê de pêvajo û parêznameyên Rêbertî xwendin.
• Jinên ciwan bi rêya înîsiyatîfa “Pêwîstiya min bi Aştiyê heye” beşdarî çalakiya jinan a li Enqerê dibin û daxwazên xwe yên vê pêvajoyê tînin ziman.
• Hefteya bihurî li Riha, Edene, Stenbol, Wan û Amed bi awayek hemwext komxebat hatin lidar xistin.
ARMANC PARADÎGMAYA RÊBER APO BI CIVAKÎKIRINE
Eda Kelefat, diyar kir ku di vê pêvajoyê de ciwan her ku diçe bêtir ber bi rêxistinbûnê ve diçin, armanca xebatên wan paradîgmaya Rêber Apo bi civakîkirine û got, “Her têkoşîneke ku em didin meşandin armanca wê ew e ku gel xwe birêve bibe. Bi taybetî ji bo jin û ciwan di nava têkoşîna jiyana azad de bibin pêşengên sereke ev têkoşîn tê meşandin.”
