Gaziyên şer Hogir Amed û Serkêş Riha 11’ê Mijdara 2024’an li Hesekê di encama teqîna mayînekê de bi hevalê xwe Hemze Serêkaniyê re li Hesekê şehîd bûn. Ji hevrêyên herdu cangoriyan, Leyla Amûdê têkildarî kesayet û têkoşîna şehîd Hogir û şehîd Serkêş axivî.
Leyla Amûdê diyar kir ku di şoreşa Kurdistanê de gelek hatine dayin û got, “Her şehîdekî me mîna çiyayekî ye. Ji bo me qedirbilindî ne. Şopandina rêya şehîdan erk û wezifeya her yekî ji me ye. Van hevalan gelê xwe, welatê xwe, Rêber û hevalên xwe bi canê xwe parastin. Şehîd Hogir Amed û şehîd Serkêş Riha jî ji wan hevrêyên me yên hêja ne. Li kêleka wan jî hevrê Hemze Serêkaniyê di êrîşeke nemerd de şehîd bûn.”
Leyla Amûdê bi bîr xist ku Hogir û Serkêş du hevalên gaziyên şer bûn û got, “Ji bo azadiya gelan ji bedena xwe parçe dabûn. Tevî vê jî her kar û xebata şoreşê pêk dianîn. Di van kar û xebatan de gelek caran rûbirûyê mirinê hatin. Lê weke du fedaiyên azadiyê canê xwe ji bo jiyaneke bi rûmet kiribûn sîper. Van hevalan kêlî bi kêlî di nav têkoşînê de cih girtin. Dixwestin gelê xwe ji bin zilm û zordariyê rizgar bikin. Van ciwanên fedaî soza xwe dan û di şoreşa Rojava de bûn lehengên azadî û rûmetê.”
Bi dewamî anî ziman ku êrişên li ser şoreşa Rojava ne êrîşên welê ji rêzê bûn û wiha domand, “Hemû hêzên dirinde û hov ji bo şoreşa mirovatiyê hilweşînin êrîş kirin. Van hevalan jî li hember van hovan û yên li pişt wan helwesta xwe ya herî însanî nîşan dan û şer kirin. Van hevalan bi şer, têkoşîn, berxwedan û sekna xwe xwestin dawiyê li şer, tundî û desthilatdariyê bînin.”
Leyla Amûdê destnîşan kir ku li hemberî erk, xebat û têkoşîna hevalên weke Hogir û Serkêş hemû vegotin û destan kêm dimînin û axaftina xwe bi vî rengî dewam kir, “Helbet ya girîng ew e ku em di roja xwe de wan bidin jiyandin. Hedef û armancên ew ji bo wan şehîd ketine tekez em ê pêk bînin. Em ê têkoşîna şehîd Hogir û şehîd Serkêş bi serketinê tacîdar bikin. Weke jin, ciwan û giştî civak divê em xwedî li têkoşîn, mîras û xeta şehîdan derkevin. Divê em helwesta ku wan şehîdan nîşan da, bi awayekî layiqî wan pêş bixin. Em li ser şopa wan in, em şagirt û şervanên wan in. Em soz didin ku xwîna wan hevalan li erdê nemîne. Em ê têkoşîna xwe ji bo azadî, wekhevî û edaletê xurt bikin. Ji bo em karibin bibin layiqî wan, asta têkoşîna xwe em ê bilind bikin.”
Leyla Amûdê anî ziman ku tişta îro ji wan tê xwestin ew e ku her kêlî, gav bi gav têkoşîn û xebata xwe pêş bixin û wiha axivî, “Rêber Apo di nav şert û mercên herî giran de ji bo demokrasî, azadî û wekheviyê têkoşîn dike. Êdî tehemula mirovan ji pergala zordar re nemaye. Ji bo ew pergal û zîhniyeta zordar têk biçe em ê berxwedan û têkoşîna xwe di nav her şert û mercî de bidomînin û serkeftinê bi dest bixin. Li hember êrîşkaran em ê ti carî paşde gav neavêjin.”
Leyla Amûdê axaftina xwe wiha bi dawî kir, “Ji bo em bibin layiqî şehîd Hogir û şehîd Serkêş ji her demê zêdetir em ê ji dil û can bixebitin. Şoreşgerî tenê ne bi çekê ye, bi fikir, ked û xebatê jî dibe. Em ê rê nedin êrîşkar û xayînan. Em ê nehêlin kes bi ked, têkoşîn û destketiyên me bilîze. Em ê xwedî li Rêbertî, şehîdan û gelên xwe derkevin. Bi wesîleya duyemîn salvegera şehadeta heval Hogir, heval Serkêş û heval Hemza ji malbatên xwe yên xwedî nirx re sersaxiyê dixwazim. Bi rêz û hurmet em şehîdên xwe bi bîr tînin.”
