Li bajarê Dortmund ê Elmanyayê wê di 13’ê Îlonê de Festîvala Çanda Kurd a Navneteweyî ya 33’emîn bê lidarxistin. Çalakiya ku wê li navnîşana Remydamm/Victor-Toyka Str. 44139 pêk were, wê ruhê berxwedanê, çand û hunerê ya Kurdên li Ewropayê bigihîne hev.
Endamê Komîteya Amadekar a Festîvalê û Hevserokê KCDK-E’yê Engîn Sever li ser amadekariyên festîvalê ji ANF’ê re axivî.
Engîn Sever anî ziman ku festîvalên çandê di têkoşîna dîasporayê de xwedî cihekî taybet e û got, “Festîvala Çanda Kurd a Navneteweyî ku ya destpêkê di sala 1992’an de li eyaleta NRW’ê ya Elmanyayê pêk hat, 32 sal in bê navber dewam dike. Ev festîval il hemberî asîmîlasyona li se çand û nasnameya gelê Kurd bû nîşaneya berxwedêriya parastinê. Her festîval bi coş û xwedîderketineke nû pêk hat.”
Sever anî ziman ku Festîvala Çanda Kurd a Navneteweyî ya 33’emîn wê bi dirûşma ‘Aştî û civaka demokratîk’ were lidarxistin û got, “Festîval wê ne tenê kombûneke çandî be, her wiha bibe kombûneke siyasî. Hunermend û siyasetmedarên ji çar parçeyên Kurdistanê wê derkevin ser dikê.”
BENDEWARIYA PEYAMEK JI RÊBER APO
Li gel amadekariyên festîvalê her wiha bi kelecaneke mezin peyamek ji Rêber Apo tê hêvî kirin. Hevserokê KCDK-E’yê Sever anî ziman ku peyamên Rêber Apo ji bo gelê Kurd xwedî wateyeke mezin e û got, “Her nivîs, her peyamek ku ji Rêber Apo tê coşeke mezin dixe nava gelê me. Gelê me azadiya xwe di azadiya Rêber Apo de dibîne. Dema ku tengav dibe, bi dengê wî bêhn tê ber gelê me.”
Sever destnîşan kir ku weke komîteya festîvalê bendewariya wan a herî mezin ew e ku ji Rêber Apo peyamek bê û got, “Em dixwazin heta roja dawî ev kelecan dewam bike. Em hêvî dikin ku wê peyameke bi vî rengî bê.”
AMADEKARÎ LI BER QEDANDINÊ YE
Engîn Sever anî ziman ku amadekariyên wan çar meh in bi rêk û pêk dimeşin û got, “Me îro civîna xwe ya dawî ya festîvalê lidar xist. Ji bernameyê heta dikê, ji standên xwarinê heta bi ewlekariyê me hemû detay nirxand. Vê gavê amadekarî temam bûne.”
Li ser detayên din ên festîvalê jî Sever got, “Ji bo girseyê bigihîne qadê zêdeyî sed otobus û bi hezaran wesayit hatin amadekirin. Bêguman ji bernameyê heta bi dikê, ji standan heta bi ewlekariyê amadekariyên li ser hemû detayan wê heta roja dawî ya festîvalê jî dewam bikin.
Armanca me ew e ku têkoşîna mafdar a gelê Kurd ku li ser bingeha banga aştî û civaka demokratîk derxist holê û rewşa heyî ya Kurdan bi rengê herî baş vebêjin; her wiha nîşanî hemû civakan bidin ku ji bo aştî û azadiyê di kîjan astê de têdikoşe. Em bi vê hesasiyetê nêzîk dibin.
Saziyên me hemû, yanî 420 saziyên ser bi KCDK-E’yê niha bi ruhê seferberiyê kar dikin. Ji Bakurê Fransayê, Belçîka, Hollanda, seranserê Elmanya û beşek ji Swîsre û Awûstûryayê girseya gel wê tevlî festîvalê bibe. Weke komîte me detayên van hemûyan nirxand. Dikarim bibêjim ku em bi hemû pêkhateyên xwe ji Festîvala Çanda Kurd a Navneteweyî ya 33’emîn re amade ne.”
‘EM BI RUHÊ SEFERBERIYÊ LI HEV KOM BIBIN’
Endamê Komîteya Amadekar a Festîvalê û Hevserokê KCDK-E’yê Engîn Sever herî dawî bang li gelê Kurd ê li Elmanyayê kir ku ji heft heta heftê salî her kes bi kincên xwe yên gelêrî, bi reng û nasnameya xwe beşdarî festîvalê bibin û got, “Divê her kes bi ruhê seferberiyê di nava vê têkoşînê û têkoşînê de bin.”
Sever destnîşan kir ku peyama herî mezin a festîvalê wê li qadê bê dayin û got, “Ji ber vê yekê em li bendê ne ku gelê me di serî de ciwan, jinên Kurd, dayikên me û gelê me, ji heft heta heftê salî bi ruhê seferberiyê beşdarî Festîvala Aştî û Civaka Demokratîk a 33’emîn bibe. Em ê li wir bin û em li benda gelê xwe ne. Di 13’ê Îlonê de em ê li wê derê îradeya xwe nîşan bidin. Bi heman rengî em ê diyar bikin ku xwedî li Paradîgmaya Aştî û Civaka Demokratîk derdikevin û daxwaza azadiya fîzîkî ya Rêber Apo dikin. Em li benda her kesî ne.”
