Li kampa koçberan li her konekî vegirtî çirûskeke hêviya vegerê heye. Piştî peymana 10`ê Adarê ya di navbera Hikûmeta Veguhêz a Şamê û Hêzên Sûriyeya Demokratîk (QSD) de hate îmzekirin, ku têde bendeke têkildarî vegera koçberan a bi awayekî ewle heye, hêviya koçberan ya vegera ji bo cih û warên wan zêde bûye. Lê belê hîna jî li herêmên weke Girê Spî, Serêkaniyê û Efrînê kiryarên dagirkeriyê didomin.
Koçberên Girê Spî yên li Eyn Îsayê dijîn têkildarî vegera ji bo cih û warên xwe ji ANF’ê re axivîn û diyar kirin ku divê ew êdî vegerin li ser axa xwe û ew dixwazin dema ew vedigerin dagirkerî û çeteyên wê li herêmên wan tune bin.
Koçbera ji Girê Spî ya bi navê Ezîze Hesen anî ziman ku êdî ew li bendê ne ku ew benda têkildarî vegera koçberan a di peymana 10’ê Adarê de ciih digire, pêk were, ew vegerin ser axa xwe û got: “Em di konan de dijîn, rewşa me ya di van konan de gelekî nebaş e. Zivistanan gelekî sar e û havînan jî gelekî germ e. Em li benda wê bendê ne ku em vegerin ser axên xwe. Em jî dixwazin êdî vegerin û li ser axên xwe bijîn.”
`EM VEGEREKE BI EWLE DIXWAZIN`
Ezîze Hesen piştre anî ziman ku ew daxwaza vegereke bi ewle dikin û got: ‘’Ev 6 sal in em bi hêvî û bendewariya vegerê dijîn. Mafê me ye ku em vegerin û li ser axa xwe bijîn. Divê em bi awayekî ewle vegerin. Piştî vegerê jî li ser axa me dagirkerî û çete nebin. Em bang li saziyên mafê mirovan û hemû aliyên cîhanî dikin ku em êdî vegerin cih û warên xwe.’’
`6 SAL IN EM BI HÊVIYA VEGERÊ DIJÎN`
Yek ji koçeberekî din ê bi navê Ekrem Mihemed El Elî ku ji Girê Spî ye û li kampa Eyn Îsayê dimîne, diyar kir ku ew li bendê ne ku benda têkildarî vegera koçberan pêk were û ev yek anîn ziman: ‘’Em di van çadiran de jiyana xwe berdewam dikin, ev 6 sal in jiyana me bi dijwarî derbas dibe. Jiyana di van konan de gelekî dijwar e, zivistanan sar û havînan jî gelekî germ e. Peyman çêbûn û qaşo wê vegera me nêz bibe, lê belê ev yek pêk nehatiye. Mafê me ye jî ku em vegerin ser axa xwe û jiyana xwe li cih û warên xwe berdewam bikin. Daxwaza me ye ku vegera me bi ewle be.’’
