Nerazîbûnên li dijî êrîşên li ser Bakur û Rojhilatê Sûriyeyê îro jî li gelek bajaran dewam kir. Li Êlihê bi pêşengiya Meclîsa Ciwanan a Partiya Wekhevî û Demokrasiyê ya Gelan (DEM Partî) meşek hate lidarxsitin. Girseyê ku li Kolana Gulîstan li hev civiyan, pankarta, “Rojava ne bi tenê ye, ciwan xwedî li Rojava derkevin” vekirin.
Endamê Meclîsa Ciwanan Adnan Vural di meşê de axivî û wiha got, “Têkoşîn û mafê azadiyê ya gelê Kurd tê hedefgirtin. Ev êrîş ne tenê xakan, rûmeta mirovahiyê jî hedef digrin. Li Rojava qetilkirina sivîlan, avêtina mirovan ji avahiyê û hilweşandina taxan, nabe bi tu hincetê were ravekirin.”
Parlamenterê DEM Partî yê Êlihê Ruştu Tiryakî jî wiha got, “Di dema ku muzakere dewam dikin de, weke banga Îsraîl li Xezeyê li Filîstiniyan kir, siharekî gotin hûnê heta saet 3’an Şêxmeqsûd û Eşrefiyê vala bikin. Bêyî tu pevçûn û rageşiyê, destûr nehat dayîn ku li Helebê ku cîranê Kurdistanê ye, Kurd jiyan bikin. Wê rojê Sûriye hemû daxwazên muzakereyê yê Rêveberiya Xweser red kir.”
Wêneyê qetilkirina bi hovanê ya ciwanekî Kurd ku li wê derê hatibû girtin, hate nîşandan. Jiyana ku rêveberiya Sûriyeyê ji bo gelê Kurd rewa dibîne ev e. Wêneyê ku ji Kurdan re rewa dibînin ev e. Derxistina dil û çavê Kurdekî. Lê bila her kes bizanibe ku dilê tu Kurdekî bêdeng nebû. Dilê 40 milyon Kurdan wê li Rojava, li Helebê biavêje. Ger em ji bîr bikin ku çav û dilê Kurdan hatine derxistin, bila dilê me hemûyan ziwa bibe.”
Girseyê piştî axaftinan dest bi meşê kirin û gelek caran dirûşmeyên “Kurdistan wê ji faşîzmê re bibe gor”, “Bijî berxwedana Rojava” û “Bijî Serok Apo” hatin berzkirin. Piştî meşa ku heta Bulvara Turgut Ozal hat kirin, ji bo şehîdan deqîqeyek rêzgirtinê hate girtin.
XARPÊT
Rêxistina DEM Partiyê ya Depê, li ber avahiya partiyê êriş şermezar kir. Di daxuyaniya ku tê de pankarta “Rojava wijdan e, azadî ye, berxwedan e, nayê teslîmgirtin” hate hilgirtin de, Hevseroka DEM Partiyê ya Depê Sema Atalan axivî. Sema Atalanê destnîşan kir ku bi çekên giran hedefgirtina qadên sivîl, li dijî gelên Kurd, Elewî û Ereb “hewlekê eşkere ya tunekirinê ye.”
