Parlamenter Victor Aldaya di rûniştina parlamentê de bal kişand ser êrişên leşkerî yên çeteyên HTŞ û DAÎŞ’ê yên li ser Hêzên Sûriyeya Demokratîk (QSD) û hişyarî da ku ev pêvajo wê ne tenê ji aliyê leşkerî ve her wiha ji aliyê civakî û siyasî ve jî encaman bi xwe re bîne.
Aldaya anî ziman ku êrişên rêveberiya Sûriyeyê ya veguhêz a bi serkêşiya Ahmed el Şaraa yên bi taybetî li Helebê hatin kirin, bûn sedema mirina gelek sivîlan, binpêkirina giran a mafên mirovan û koçberbûna bi deh hezaran kesî. Aldaya ragihand ku polîtîkayên înkar û zextê yên li ser gelê Kurd xwedî piştperdeyeke dîrokî ye û diyar kir ku ev pevajo bandorê li erdnîgariyeke berfireh a ji Sûriye, Tirkiye, Iraq û Îranê dike.
Di dewama axaftina xwe de ragihand ku êrişên heyî li ser modela siyasî ya rêveberiya xwecihî û pirreng a li bakurê Sûriyeyê ye.
Parlamenter Victor Aldaya bal kişand ser rola dîrokî ya jinan a li bakurê Sûriyeyê û destnîşan kir ku Yekîneyên Parastina Jinê (YPJ) ne tenê hêzeke leşkerî ya têkoşîna li dijî DAÎŞ’ê ye, di heman demê de nîşaneya veguherîna civakî ya li herêmê ye. Aldaya hişyarî da ku êrişa li hemberî vê modelê wê encamên cidî têkildarî paşeroja herêmê bi xwe re bîne.
Aldaya ji bo aştiyê bang kir û got, mafê diyarkirina çarenûsa xwe ya gelan pîvaneke gerdûnî ye ku dest jê nayê berdan.
Di dawiya rûniştinê de li ser daxwaza Aldaya pêşkêşî dengdanê hate kirin ku ev nirxandin radestî Wezareta Karên Derve ya Uruguayê û nûnertiya Neteweyên Yekbûyî ya li Uruguayê bê kirin. Pêşniyar bi piraniya dengan hate qebûlkirin.
