Di demeke ku çeteyên ser bi DAIŞ-HTŞ û dewleta Tirk êrişên xwe yên li ser herêmê zêde kirine de, banga seferberiyê ya li Bakur û Rojhilatê Sûriyeyê di gelek qadên jiyana civakî de bersiv dît. Di vê pêvajoya ku gefên ewlehiyê lê giran bûne de, ne tenê hêzên parastinê, lê gelê herêmê jî bi rihê seferberiyê tevlî pêvajoyê dibe.
Li gel şervanên ku di xetên parastinê de cih digirin, welatiyên li tax û gundan jî li gorî derfetên xwe torên piştgiriyê ava dikin. Bi taybetî jin, ciwan û kal û pîr, ji bo dabînkirina pêdiviyên bingehîn ên welatiyên ku nobetê digirin û hêzên parastinê, xebatên xwebexş dimeşînin.
Esnafekî ku li bajarê Hesekê dikanekê bi rê ve dibe, wek mînakên berçav ên vê piştgiriyê derdikeve pêş. Ev welatî her êvar serdana xalên parastin û nobetê dike; nan, av û helwa jî di nav de, xwarinên bingehîn belav dike.
Esnafê navborî diyar kir ku ew vê piştgiriyê wekî erkekê dibîne û sedema tevlîbûna xwe ya pêvajoya seferberiyê bi van gotinan anî ziman: “Ez her roj diçim xalên nobetê. Em serdana gelê xwe yê ku li dijî komên çete xweparastinê dike, dikin. Erka me ye ku em li cem gelê xwe bin. Di dikanê de çi hebe, em her roj parve dikin.
