Bi rûxandina rejîma Baas re û hatina HTŞ’ê ya li ser desthilatdariya Şamê re, gel û jinan guhertinek erênî jiyan nekir. Her tim rola jin li Sûriyeyê hatiye çewisandin û tune kirin, ji daxuyaniyan bigrin û heta destûra nû ya Sûriyeyê ti xal ji bo mafên jinan nehatine diyarkirin. Têkildarî vê yekê 23’yê Adara 2025’an konferansa yekemîn a jinên Kurd li Rojavayê Kurdistanê hate lidarxistin, Hevseroka Partiya Nûjen a Demokratîk a li Bakur û Rojhilatê Sûriyê Heyfa Mehmûd ji ANF’ê re li ser girîngiya Konferansa jinên Kurd axivî.
Heyfa Mehmûd bal kişand ser rewşa jin a li Sûriyeyê û ev tişt bilêv kir: ”Di dem û rewşeke hesas de roja îro konferansa yekemîn a jinên Kurd li Rojavayê Kurdistanê tê lidarxistin. Piştî hilweşîna rejîma Baas, rejîmeke nû hat ser desthilatdariyê. Piştî ku destûra Sûrî bi ewqas xalan hate îlankirin, mafê jin qet di wê destûrê de derneket pêş. Em dîsa dîroka Sûrî ya berê dubare dikin, ev sedsal sedsala jinan e. Lê bi van zagonên ku tên derxistin, dixwazin jinan tenê di mal de sînordar bihêlin û tu nêrînên wan ên siyasî û leşkerî dernekevin hole.”
Heyfa di nav axaftina xwe de bal kişand ser Konferansa jinên Kurd û diyar kir ku hejmarek zêde jin beşdarî konfransê bûn. Heyfa wiha domand, ”Gelek jin di konferansê de kom bûne ji bo ku helwesta xwe nîşan bidin. Ev kombûn gavekî xurt e û gelek girîng e. Weke ku tê zanîn di roja me ya îro de çavê hemû jinên Sûriyeyê li jinên Kurd e û bi taybetî jî çavê wan li jinên Bakur û Rojhilatê Sûriyeyê ne. Ji ber ku ew xwedî tecrubeyeke demokratîk in, her wiha di wir de pîvanên ji bo jinan hatine tespîtkirin. Ev kombûn girîng e ji ber ku em wekî jinên Kurd ne tenê ji bo jinên Kurd xebat dikin, em ji bo hemû jinên cîhanê xebatê didin meşandin. Her wiha weke jinên Kurd dîrokek me heye, ji bo wê ev konferans wê bibe dengê hemû jinên Sûrî. Divê jin li dijî bêmafiyê bêdeng nemînin.
Ev konferansa ku hatiye lidarxistin, peyameke ji bo hemû jinan û siyasetmedaran. Eger doza Kurdan neyê çareserkirin, pirsgirêka Sûrî nayê çareserkirin. Doza Kurd pirsgirêkeke sereke û girîng e di Sûrî de, eger doza Kurd neyê çareserkirin wê pirsgirêka Sûriyê her berdewam bike, li ser wê esasê divê Kurd yekrêziya xwe û helwesta xwe bidin pêş.”
