Meclisa Malbatên Şehîdan a bajarê Dirbêsiyê yê kantona Cizîrê bi boneya salvegera 14’an a şehadeta endamê Koordînasyona KCK’ê fermandar Rustem Cûdî, merasîma bîranînê li ser gora wî ya li gundê Berkevirê li dar xist.
Ji tevahiya herêmên kantonê endamên meclisên malbatên şehîdan, saziyên sivîl, tevgerên jin û ciwanan beşdarî merasîmê bûn.
Merasîmê bi rêzgirtinê dest pê kir. Piştre ji rêveberên Meclisa PYD’ê ya bajarê Dirbêsiyê Xebat Ehmed axivî.
Xebat Ehmed di axaftina xwe de şehîd Rustem Cûdî hemû şehîdên azadiyê bi bîr anîn û got: “Şehîd rûmeta gelan in. Şehîdan roleke mezin di parastina çand û hebûna gelan de lîst.”
Ehmed di dewama axaftina xwe de bal kişand ser taybetmendiyên şehîd Rustem Cûdî û têkoşîna wî û got: “Şehîd Rustem Cûdî di tevgera azadiya Kurdistanê de têkoşerekî pêşeng bû. Li hemberî siyasetên dagirkirî û qirkirinê tê koşiya û bû yek ji sembolên neteweya demokratîk û civaka demokratîk.”
Birayê şehîd Rustem Cûdî Xelîl Osman bi navê malbata şehîd axivî û anî ziman ku xwedîderketina li xeta şehîdan bi domandina têkoşînê û parastina destkeftiyan e. Her wiha destnîşan kir ku dê heya avakirina civakeke demokratîk û pêkanîna azadiyê şopdarên rêya şehîdan bin.
Merasîm bi berzkirina dirûşmên dilsoziya bi şehîdan re bi dawî bû.
Rustem Cûdî (Rustem Yûsif Xelîl) sala 1965’an li gundê Xirbe Dibis ê Serêkaniyê ji dayik bûye. Piştî ku xwendina xwe ya amadeyî li bajarê xwe diqedîne berê xwe dide Şamê û beşa Zanistên Çandiniyê dixwîne. Di wê demê de endamê Partiya Çep a Kurd bû. Di sala 1987’an de beşdarî paneleke Rêber Abdullah Ocalan dibe. Di panelê de PKK’ê û felsefeya Rêber Apo nas dike. Piştre tevlî refên partiyê dibe. Piştî ku dewreyeke perwerdeyê li Akademiya Şehîd Mahsûm Korkmaz a li Lubnanê bi dawî dike, berê xwe dide çiyayên Kurdistanê û rêwîtiya têkoşîna çekdarî dide destpêkirin.
Rustem Cûdî li herêmên Botan, Gabar û deverên din fermandariya gerîla dike. Di sala 1998’an de berê xwe dide Rûsyayê da ku wezîfeya şoreşê di nava Kurdan de pêk bîne. Di sala 2003’yan de ji bo rêvebirina Kongreya Gel a Kurdistanê tê hilbijartin û li hemberî xeta tesfiyekirin û dijbertiya li rêgez û nirxên partiya şoreşerî disekine. Piştre jî wek endamê Konseya Rêveber a KCK’ê tê hilbijartin.
Fermandar Rustem Cûdî 27’ê Îlona 2011’an di êrîşa hewayî ya artêşa Tirk a dagirker de li herêma Xinêrê ya Xakurkê ya Başûrê Kurdistanê şehîd bû.
Gerîlayên azadiyê ji bo tolhildana fermandar Rustem Cûdî û hevalên wî di 19’ê Cotmeha 2011’an çalakiyeke mezin a tolhildanê li dijî artêşa Tirk a dagirker li dar xistibû.
