Ji bo 731 leşkerên ku li Vietnamê di şerê dehan salan de jiyana xwe ji dest dan û hestiyên wan nû hate dîtin, li bajarê Ho Chi Minhê merasîma cenaze hate lidarxistin. Bi deh hezaran kes li ser rêgeha ber bi goristana leşkerî li hev civiyan. Hinek welatiyan rahiştin kulîlkên spî, hinekan jî dua kirin. Darbestên ku bi ala neteweyî ya Vietnamê hatibûn pêçandin, bi otobusan birin goristanê.
Hestî yên wan leşkeran e ku di sala 1968’an de di dema tepisandina raperîna komunîst a ji aliyê hêzên bi piştgiriya Dewletên Yekbûyî yên Emerîkayê (DYE) jiyana xwe ji dest dan. Hestiyên ku ji gorên şexsî û komî hatin derxistin, di çarçoveya kampanya lêgerînê ya neteweyî ya 500 rojî de ku meha Adarê destpê kir, li Parka Le Thi Riengê ya li bajarê Ho Chi Minh hate dîtin.
Ji meha Tîrmehê û vir ve bi sedan leşker û pispor li gel makîneyên kar û pompeyên avê ji bo derxistina hestiyên mirovan dixebitin. Ji ber ku li hin herêman herî heye, ji bo dîtina hestiyan bi destan kolandin tê kirin.
Alîkarê Şaredarê Ho Chi Minh Nguyen Manh Cuong li merasîmê axivî û diyar kir ku ji bo dîtina leşkerên winda her firsend û rêbaz wê bêne bikaranîn.
Tê texmînkirin ku di şerê navbera salên 1945 û 1975’an de ku destpêkê li hemberî Fransayê, piştre jî li hemberî DYE’yê hate kirin, 1, 2 milyon leşkerên Vietnamî jiyana xwe ji dest dan.
Hikumeta Vietnamê dixwaze ku heta Tîrmeha 2027’an hestiyên 7 hezar leşkerî bibîne.
