Li paytexta Belçîka Brukselê ev sê roj bûn ku bi armanca nasandina çand û hunera Kurdî festîvaleke li qada vekirî pêk dihat. Her roj bi bernameyên cur bi cur, her roj bi derketina hinek hunermendan pêk dihat. Duh bi beşdariya bi hezaran Kurdistanî û dostên wan bi coşeke mezin bi dawî bû. Roja sêyem piranî bi nîşandana govend, cil berg û xwarinên kurdî ve dewam dikir, heya bi derengiya danê êvarê domand. Gelek Kurdistaniyên ku li bajarên cihê yên Belçîka dijîn, bi cil û berg, xwarin û nîşandana kelepûrên ji herêmên xwe, beşdariya xwe pêk anîn. Ev festîvala çand û hunerî ku her sal di demsala havînê de tê lidarxistin û bi pêşengtiya NAV-BEL û tevgera Çand û Hunera Kurdî ya li Ewropa pêk hat, îsal rastî eleqeyeke mezin a biyaniyan hat.
Gelek hunermendên weke: Bengî Agirî, Xelîl Sadiqî, Sîpan û Amara, Hunermend Hekîmo, Hemîd Urmiye, Koma PEL, Hozan Terî, Semîr Elî, Emre Gultekîn, Kawa Somer, Koma Tovjîn, Def û Zirne û DJ Kurdo bi awaz û stranên xwe coşeke mezin dan gelê li qadê. Li rex wê jî dayîkên Kurd ên ji beşên cihê yên Kurdistanê ku konên xwe vedabûn, xwarinên Kurdî belav kirin û her wiha pêşangehên cil û bergên Kurdî û pirtûkan jî li rex hebûn. Her wiha hêjayî gotinê ye ku her kesî bi lixwekirina cil û bergên ji bajarên cihê yên Kurdistanê rengeke cuda dabûn festîvala îsal.
Festîvala ku di 22’yê Tebaxê de destpê kiribû, ev sê roj bûn li meydana Place d’Espagne ku li navenda Brukselê ye, dihat lidarxistin. Her roj danê nîvro seet 13:00’an destpê dikir, heya bi derengiya êvarê bi aktîvîteyên cihêreng berdewam dikir. Duh 24’ê tebaxê bi coş û xiroşeke mezin bi dawî bû.
