Festîvala Jinan a Zîlan ku îsal di 28’ê Hezîranê de cara 21’emîn li Londonê tê lidarxistin, di têkoşîna azadiyê ya jinê de yek ji çalakiyên herî girîng ên jinan e ku hilberîna çandî, berxwedan û hişê têkoşînê digihîne hev. Festîvala ku yekemcar di sala 2004’an de bi dirûşma “Jin sînoran derbas dikin” destpê kir, di nava salan de bi tecrûbeyên berxwedanê û rojevên têkoşîna jinan bi dirûşmên cuda rêwîtiya xwe dewam kir.
Festîval ji Kobanê heta bi Şengalê, ji Efrînê heta bi seranserê Rojava bû yek ji dengvedana berxwedana jinan a li Ewropayê.
Festîvala ku bi navê çalakgera fedaî ya tevgera azadiyê ya jinên Kurd Zîlan tê lidarxistin, di nava 21 salan de ne tenê weke çalakiyeke çand û hunerê, her wiha bû zemîneke welê ku têkoşîna hevpar, hiş û piştevaniya jinan gihand hev.
Festîvala Jinan a Zîlan a 21’emîn amadekariyê dike ku îsal li Londonê jinên ji gel, nasname û baweriyên cuda yên li çar aliyên Brîtanyayê bigihîne hev. Festîval ji aliyê Meclîsa Jinan a Jiyan ve tê birêxistinkirin û di 28’ê Hezîranê de li Enfield Albany Parkê tê lidarxistin.
ÎSAL ‘DEM DEMA JINAN E’
Festîvala ku îsal bi dirûşma “Dem dema jinan e” tê lidarxistin diyarî Rojbîn Amara û Denîz Çiya hate kirin ku li Helebê şehîd bû.
Festîval wê li Albany Parkê saet di navbera 13:00-18:00 de pêk were û gelek xwepêşandanên muzîk, dans, govend, pêşangeha kincên gelêrî yên Kurdî, standên deqê, standên xwarinê û çalakiyên cuda wê hebin. Ji bo zarokan jî wê atolyeyên boyaxkirina rû, hunerê, lîstik û aktîvîteyên cuda tevahiya rojê dewam bikin.
Hunermend Zerya, Kewê û Olcay Bayir wê derkevin ser dikê û yek ji kesayetên girîng ên siyaseta Kurd Sebahat Tûncel weke mêvana rûmetê wê beşdarî festîvalê bibe. Her wiha ji partiyên siyasî yên cuda û rêveberiyên xwecihî yên Brîtanyayê wê gelek siyasetmedarên jin weke qiseker beşdarî festîvalê bibin.
Beriya festîvalê wê ji aliyê Meclîsa Jinan a Jiyan ve bi beşdariya Sebahat Tûncel paneleke taybet bê lidarxistin. Bûyerên dawî yên siyasî yên li Tirkiye û Rojhilata Navîn, têkoşîna jinê, daxwazên çareseriya demokratîk ên gelê Kurd û kampanya ‘Mafê Hêviyê’ ya ji bo Rêber Apo wê di panelê de bêne nirxandin.
DIYARÎ DENÎZ ÇIYA Û ROJBÎN AMARA HATE KIRIN
Ji Komîteya Amadekar a Festîvalê Mizgîn Colemêrg ji ajansa me re axivî, di serî de Denîz Çiya û Rojbîn Amara hemû jinên ku di nava têkoşîna azadiyê ya gelê Kurd de jiyana xwe ji dest dan bi hurmet û minet bi bîr anî û diyar kir ku ew festîvala îsal bi dirûşma “Dem dema jinan e” pêşwazî dikin.
Mizgîn Colemêrg anî ziman ku dirûşma “Dem dema jinan e” ne tenê dirûşmeke festîvalê ye û got, “Ev dirûşm asta ku jinên Kurd di têkoşîna azadî, wekhevî û civaka demokratîk de gihîştine nîşan dide. Di heman demê de ji aliyê avakirina jiyanê, parastina aştiyê û avakirina civaka demokratîk ve weke hêza pêşeng derdikevin pêş. Ji ber vê jî em bi rastî dibêjin niha dem dema jinan e.”
‘MAFÊ HÊVIYÊ ROJEVA ME YA BINGEHÎN E’
Colemêrg destnîşan kir ku bi taybetî kampanya ‘Mafê Hêviyê’ ya li Ewropayê mezin dibe, wê rojeva bingehîn a festîvala wan be.
Colemêrg ragihand ku festîvala îsal wê bibe qada xwedîderketina bi xurtî ya li kampanya ‘Em hemû YPJ ne’ û ev bang kir: “Em bang li jin, ciwanan, dost û hêzên demokrasiyê hemûyan dikin ku 28’ê Hezîranê li Albany Parkê beşdarî Festîvala Jinan a Zîlan a 21’emîn bibin. Em bi hev re xwedî il bîranîna Denîz Çiya û Rojbîn Amara derkevin. Werin em bi hev re ruhê berxwedanê yê Zîlan mezin bikin. Em dengê têkoşîna azadiyê ya jinan li Londonê bigihînin hemû cîhanê. Ji ber ku Dem dema jinan e.”
Endameke din a Komîteya Amadekar Devrîm Sara jî bang li jinan û gel kir ku beşdarî festîvalê bibin û got, “Bi ruhê fedaî yê Zîlan, bi xeta jinê ya azad, bi hesreta civaka demokratîk û wekhev festîvala me wê bibe berxwedan, reng û dengê jinê.”
Endamên Meclîsa Jinan a Jiyan ku li çar aliyên Londonê civînên ji bo beşdariya li festîvalê lidar dixin, afîşan dadiliqînin û biletan belav dikin, banga tevlîbûna li festîvalê kirin.
