Festîvala Rojên Amara ku bi dirûşma “Bi Rêbertiya azad ber bi yekîtiya neteweyî ya demokratîk ve” bi wesîleya rojbûna 77’an a Rêber Apo tê lidarxistin, li navçeya Xelfetî ya Rihayê bi coş dewam dike.
Bi hezaran kesên ji bajarên Tirkiye û Kurdistanê hatin, li navenda navçeyê li Parka 4’ê Nîsanê li hev civiyan.
Girseya gel ku kincên neteweyî li xwe kir û rengên kesk, sor û zer hilda, dirûşmên “Bijî Serok Apo” û “Rojbûna te pîroz be ey Serok Apo” qîriya.
Pankartên bi nivîsa “Roj li Amarayê ye, azadî tê”, “Jin, Jiyan, Azadî”, “Bi Rêbertiya azad ber bi yekîtiya neteweyî ya demokratîk ve” û “Bi civaka demokratîk ber bi jiyana azad a dûrî ji tundiyê” li qada pîrozbahiyê hatin daliqandin.
Li qada festîvalê, standên cuda hatin danîn û ji bo zarokan jî qadên lîstikê û konên atolyeyê hatin avakirin.
Beşdarên pîrozbahiyê li ber stranan govend gerandin.
