Forûma Sûriyeyî ya Pêncemîn ku ji hêla Partiya Yekitiya Demokratîk (PYD) ve tê birêxistinkirin, li navenda partiyê ya li Hesekê dest pê kir.
120 siyasetmedar, rewşenbîr, rêxistinên jinan, çalakvanên ji Şam, Heleb û herêmên peravên Sûriyeyê û serokên eşîrên Ereban tev li forumê dibin.
Forûmê bi deqeyeke rêzgirtinê dest pê kir, piştre Hevserokê PYD’ê Xerîb Hiso axivî.
Xerîb Hiso got ew di kêliyeke dîrokî ya krîtîk de dicivin ku hewcedariya lezgîn a hemû sûriyeyiyan bi yekitî û hevgirtinê heye da ku bikarin welatekî azad û demokratîk ava bikin.
Hiso bal kişand ser girîngiya Banga Aştî û Civaka Demokratîk a ku ji hêla Rêber Apo ve hatiye pêşniyarkirin û da zanîn ku ew rêya rastîn a çareserkirina aloziyên heyî ye.
Hiso got: “Çi li Sûriyeyê û çi li seranserê herêmê ku şer û pevçûnên siyasî û leşkerî yên berdewam lê diqewimin, çareseriya tekane xurtkirina nirxên demokrasiyê ye, li ser bingeha naskirina siyasî û yasayî ya hemû pêkhateyan. Ji bilî wê rêyek ji bo rizgarkirina welêt tune ye, ji ber ku ev rêya herî baş e ji bo pêkanîna ewlehî û aramiya siyasî, civakî û aborî ye.”
Hiso piştgiriya partiya xwe ya ji bo peymana 10`ê Adarê ya di navbera fermandarê giştî yê QSD`ê Mezlûm Ebdî û serokê hikumeta veguhêz a Sûriyeyê Ehmed El Şeri de anî ziman. Hiso got ew peyman nexşerêyeke stratejîk a ber bi avakirina Sûriyeyeke nûjen ve ye.
Xerîb Hiso destnîşan kir ku ev forum rastî salvegera 22`yemîn a damezirandina partiya wan hatiye. Hiso bi vê boneyê pîrozbahiyên xwe ji endamên partiyê û gel re şand û hemû şehîd bi bîr anîn.
Hiso di dawiya axaftina xwe de hêvî kir ku ev forûm bibe gaveke avaker ber bi aştî, aramiyê û avakirina Sûriyeyeke demokratîk û nenavendî ve.
Di forûmê rûniştina yekem dê li ser “Rewşa siyasî ya giştî û rojev û projeyên li Rojhilata Navîn” be, ya duyem jî dê bi sernavê “Sûriye piştî hilweşîna rejîma Baasê” be. Rûniştina sêyem dê li ser girîngiya Banga Aştî û Civaka Demokratîk a Rêber Abdullah Ocalan be û rûniştina çarem jî dê bi sernavê “Pêvajoya aştî û civaka demokratîk û asoyên çareseriya Sûriyeyê” be.
