Hemdemîtî destpêkirina merasîma oxirkirina fermandar şehîd Ziyad Heleb û hevrêyên wî Birûsk û Malik li Pakrewangeha Şehîd Dicle ya bajarê Kobanê yê kantona Firatê, bi armanca şermezarkirina sûc û komkujiyên çeteyên hikumeta demkî yên bi desteka dewleta Tirk a dagirker li dijî taxên Şêxmeqsûd, Eşrefiyê û Benî Zêd ên bajarê Helebê, çalakiyên curbicur li kantona Cizîrê hatin lidarxistin.
HESEKÊ
Gelê bajarê Hesekê bi hemû pêkhateyên xwe bi çalakiyek girseyî li Çerxerêya Kevokê çalakiyek li dar xist. Di çalakiyê de hevserokê Meclisa Bajarê Hesekê Farûq Tozo li ser navê meclisê sersaxî da malbatên şehîdan û tevahî gelê herêmê.
Tozo got helwesta tevahî şêniyên Hesekê ew e ku bi fedarkiyên fermandarê fedayî Ziyad û hevrêyên wî dilsos in. Tozo diyar kir ku şehîd Ziyad, ji bo Kurdan û tevahî pêkhateyên Bakur û Rojhilatê Sûriyeyê bû sembol. Di merasîma bibîranînê de hejmarek zarokan helbest li ser giyana şehîdan û Berxwedana Şêxmeqsûd û şêniyên wê û parêzvanên wê gotin.
Welatî Mihemed Haco jî di dest de wêneya dîrokî ya Berxwedana Şêxmeqsûd heye, got ev wêne wê di dilên tevahî Kurdan de zindî bimîne û tu kes nikare vîna vî gelî bişikîne.
Merasîm bi berzkirina dirûşmeyên silavkirina berxwedan û fedakariyên şehîdan û bi “Berxwedana jiyan e” bi dawî bû.
DIRBÊSIYÊ
Gelê Dirbêsiyê çalakiyek bêdeng a 5 deqeyan ji bo bibîranîna giyana şehîdên taxên Şêxmeqsûd, Eşrefiyê û Benî Zêd ên Helebê û şermezarkirina komkujiyan li dar xist.
Di kombûnê de bi dehan şênî li qada sûka navendî ya bajêr kom bûn û piştgiriya xwe bi Hêzên Ewlekariya Hundirîn û Hêzên Sûriya Demokratîk re li dijî terorê nîşan da.
TIL TEMIR
Gelê bajarê Til Temir û Zirganê bi meşeke girseyî hevgirtina xwe bi Berxwedana Şêxmeqsûd û Eşrefiyê re anî ziman.
Meş ji Çerxerêya Qendîl a li têketina başûrê bajarê Til Temirê bi beşdariya girseyî dest pê kir. Di meşê de wêneyên şehîdên berxwedanê hatin hildan.
Meşvan li kolanên sereke geriya û diruşmên silavkirina berxwedanê û fedakariya şehîdan hatin berzkirin.
Li pêş avahiya Meclisa Malbatên Şehîdan a Til Temirê, meş veguherî kombûna girseyî. Li wir li ser navê rêxistina PYDˊê ya Til Temirê Jiyan Kobanê axivî. Jiyan da zanîn ku êriş û komkujiyên li dijî şêniyên Şêxmeqsûd û Eşrefiyê ne tenê di aliyê leşkerî de bûn, lê hewla derbekirina vîna jiyana hevbeş û berxwedana gel bû.
Rêveberê Meclisa Bajarê Zirganê Hesen Hec Elî axivî û diyar kir ku çalakî û meşên li herêmê hevgirtina pêkhateyên Bakur û Rojhilatê Sûriyeyê nîşan didin.
Meş bi diruşmên silavkirina Berxwedana Şêxmeqsûd û Eşrefiyê bi dawî bû.
ŞEDADÊ
Gelê Şedadê, bi armanca şermezarkirina êriş û komkujiyên li taxên Şêxmeqsûd û Eşrefiyê pêk hatine çalakiyek li dar xist.
Di çalakiyê de endamê Komîteya Hêzên Parastina Civakî ya meclisê Mihemed El Xilêf da zanîn ku gelê bajêr, bi armanca hevgirtina bi gelê taxên Helebê re, dikanên xwe girtin. Ev yek nîşaneya yekitiya gelê herêmê nîşan dide.
HOL
Li bajarê Holê jî deriyên tevahî dikanan hatin girtin, bi dehan şêniyên bajêr li pêş avahiya PYDˊê 5 deqeyan rêzgirtin sekinîn. Şêniyan hevgirtina xwe bi berxwedana gel û Hêzên Ewlekariya Hundirîn ên Şêxmeqsûd û Eşrefiyê re nîşan da. Di heman demê de şêniyan komkujî û êrişên li dijî gel şermezar kirin.
Di dawiyê de dirûşmên silavkirina berxwedanê hatin berzkirin.
