Girtiyên PAJK û PKK’yî, bi boneya 26’emîn salvegera Komploya 15’ê Sibatê peyameke nivîskî weşandin. Girtiyan di peyama xwe de destnîşan kir ku ew banga “Rêya kesên ku qiblegeha wan Rêbertî ye, şaş nabe” ya Şehîd Asya û Rojger ku di 23’yê Cotmeha 2024’an de di çalakiya fedayî ya li hemberî TUSAŞ’ê de şehîd bûn, weke pîvana milîtaniya serdemê dinirxînin, lê xwedî derdikevin û soz dan ku ew ê ji bo azadiya fîzîkî ya Rêber Apo têkoşînê bigihînin astên herî jor.
Naveroka peyamê bi vî rengî ye:
“Me sala 26’emîn a Komploya Navneteweyî ya bi pêşengtiya hêzên hegemonîk li hemberî Rêber Apo hate pêşxistin, li dû xwe hişt ku Rêber Apo ji gelên cîhanê re bûye hêvî û li hemberî pergala modernîteya kapîtalîst alternatîfek ava kiriye. Em careke din şehîdên xwe yên leheng ên ku bi şîara ‘HÛN NIKARIN ROJA ME TARÎ BIKIN’ li hemberî komployê li dora Rêber Apo kom bûne û sekneke fedaî nîşan dane, bi rêz û minetdarî bi bîr tînin, hêzên komploger şermezar dikin û berxwedana Îmraliyê ya dîrokî silav dikin.
Hêzên navneteweyî, di serî de gelên Rojhilata Navîn naxwazin tu gel bi awayekî azad bijîn û tunekirina rêxistinên ku li hemberî pergalên wan alternatîf in, weke erka xwe ya sereke dibînin. Komploya li dijî Rêber Apo, ji bo pêşîlêgirtina Kurdê azad, Kurdistana azad û Rojhilata Navîn a azad bû. Li gorî hesaba hêzên hegemonîk; Dê li ser Rêber Apo pergala êşkenceyê ya Îmraliyê bihata sepandin, PKK bihata tasfiyekirin û gelî dê dev ji fikra azadiya berdabûna. Ji bîr kirin ku Rêber Apo ne rêberekî serhildaneke klasîk e û sîwana bi milyonan kesî ye. PKK’ya ku tasfiyebûna wê dihat hêvîkirin, mezintir bû û têkneçûyîna xwe ji her kesî re da îspatkirin. Gelê Kurd dev ji fikira azadiyê berneda; berovajî wê baweriya ji azadiyê re zêdetir bû. Ji bo azadiya xwe her cure berdêl da û hê jî dide. Rêber Apo bi paradîgmaya xwe ku bi vê paradîgmayê rê û rêbazên têkbirina modernîteya kapîtalîst pêş xist û komplo pûç kir. Hêzên komploger negihîştin armanca xwe û Rêber Apo roj bi roj zêdetir ji gelan re bû hêviya azadiyê.
Pengava azadiya Rêber Apo veguherî pêngaveke gerdûnî û ji aliyê gelan ve hate qebûlkirin û gel lê xwedî derketin. Li seranserê cîhanê di çarçoveya pêngava ‘Azadî ji Rêber Apo re, çareseriya siyasî ji pirsgirêka Kurd re’ de çalakiyên mezin hatin lidarxistin û refên berxwedanê hatin xurtkirin. Berxwedana roj bi roj mezin bûyî, faşîzm têk bir. Hevrêyên weke Şehîd Asya û Roger bi mezinkirina berxwedanê re nîşanî me dan ku di encama berxwedanê de serkeftin tê bidestxistin. Şehîd Asya bi gotina; ‘Rêya kesên ku qiblegeha wan Rêbertî ye, şaş nabe’ banga xwedîderketina Rêber Apo kir. Em jî weke girtiyên di zinadanan de yên PAJK û PKK’yî banga Şehîd Asya û Rojger weke pîvana milîtaniya serdemê dinirxînin û lê xwedî derdikevin. Kesên li ber xwe didin, dê tim û tim ser bikevin.
Weke gel û tevger em dizanin ku em di pêvajoyeke dîrokî re derbas dibin. Serdema heyî mezinkirina rêxistinbûn û têkoşînê li ser me ferz dike. Bi mezinkirina pêngava azadiyê divê em li dora Rêber Apo kom bibin û bi pêngavên rast, xwebawer û bibiryar berê xwe bidin azadiyê. Rêbertiya me dibêje; ‘Em ê teqez vê carê ser bikevin.’ Em jî weke girtiyên şoreşger di serî de jin û ciwanên fedaî, bang li gelê me yê berxwedêr û dostên xwe dikin ku ji bo pûçkirina Komploya 15’ê Sibatê û xurtkirina destê Rêber Apo, berê xwe bidin qadan; berxwedanê mezintir bikin, her derê veguherînîn qada berxwedanê û bi vî awayî pêngava azadiyê mezintir bikin. Roj roja xwedîderketina Rêber Apo, pûçkirina komployê û dabînkirina azadiya fîzîkî ya Rêber Apo ye. Bi vê hişmendî û baweriyê em dubare hêzên komploger şermezar dikin û soza mezinkirina berxwedanê didin.”
