Li gundê Kervanpinar (Arzoxlî) ê navçeya Sûra Amedê, têkoşîna li dijî projeya Santrala Enerjiya Rojê (GES) ya ZENKAR-1’ê ku tê xwestin li ser qada mêrgê bê çêkirin, berdewam dike. Di dema ku qada proje lê tê çêkirin ji aliyê cendirmeyan ve hat girtin, gundiyan li dijî vê rewşê nerazîbûn nîşan dan.
Gundiyên ku ji ANF’ê re axivîn, diyar kirin ku qadên mêrgê ji bo sewalkariyê xwedî girîngiyeke jiyanî ne û xwestin proje bê betalkirin. Şêniyên gund destnîşan kirin ku debara wan bi piranî li ser sewalkariyê ye û heke mêrg ji destê wan bên girtin, dê ev yek bibe sedema hilweşîneke aborî ya mezin.
QADÊN MÊRGÊ JI BO ME XWEDÎ GIRÎNGIYEKE JIYANÎ NE
Veysî Guger anî ziman ku qadên mêrgê ji bo gund gelekî girîng in û diyar kir ku piranîya şêniyên gund di nava zehmetiyên aborî de ne. Guger wiha got: “Em li vir sewalkariyê dikin. Em hemû xizan in; piranîya me li Stenbol û Îzmîrê di înşiatan de dixebitin. Em çend dewar an jî pez dikirin û bi wan debara xwe dikin. Van panelan tînin ber pozê me çêdikin. Ajalên me li vir diçêrin. Bila li derekî dûr çêbikin, em li dij dernayên. Lê heke li vir be, em nikarin ajalên xwe biçêrînin, debara me diqede.”
Guger her wisa bal kişand ser mirina ajalan û diyar kir ku bi tengkirina mêrgan re sewal di gihîştina avê de zehmetiyê dikişînin û ev yek dibe sedema windahiyan.
EM VÊ PROJEYÊ NAXWAZIN
Hesen Eren jî diyar kir ku hemû gund li dijî projeyê ne û got: “Kes naxwaze. Ev proje zirarê dide sewalkariyê. Huzura me xira dibe. Sewalkarî namîne. Wek gundî em bi mafdarî li dijî vê projeyê ne. Heta ku ev proje raweste, em ê têkoşîna xwe bidomînin.”
MÊRG JI ŞÎRKETAN RE TÊN PÊŞKÊŞKIRIN
Mehmetcan Kele jî bertek nîşanî pêşkêşkirina mêrgan ji bo şîrketan da û wisa axivî: “Ev mêrg yên gundiyan in, bi sedan sal in em bi kar tînin. Di vê projeyê de tu berjewendiya gundiyan tune ye. Dûrahiya wê ya ji bo malan tenê heftê metre ye. Dê germahî zêde bibe, dibe ku zirarê bide qadên me yên çandiniyê. Ev projeyeke rantê ye. Em weke gundî li dijî vê ne û çi ji destê me bê, em ê bikin.”
