Hêzên Îsraîlê di hefteyên dawî de li derdora bajêr operasyon zêde kirine, gav bi gav ber bi navendê ve diçin. Li bajarê ku hîna meha borî jî nêzî milyonek kes lê diman, dihat pêşbînîkirin ku operasyona bejahî piştî tehliyekirina gel destpê bike.
Li gorî nûçeya medyaya DYE’yê CNN û Axios a spartî rayedarên Îsraîlî, artêşa Îsraîlê roja duşemê li dijî bajarê Xezeyê tevgera bejahî da destpêkirin.
Di şerê ku 7’ê Cotmeha 2023’yan bi êrîşa Hamasê re destpê kir de, êrîşên Îsraîlê ji aliyê beşekî girîng ê raya giştî ya navneteweyî ve weke “bêrêje” tê nirxandin. Tê diyarkirin ku hejmara kesên ku heya niha di şer de jiyana xwe ji dest dane, bi texmîna herî kêm zêdeyî 64 hezar e.
WINDAHIYÊN SIVÎL ZÊDE DIBIN
Bombebarana artêşa Îsraîlê ya li ser Xezeyê didome. Li gorî Haaretz, rayedarên tenduristiyê yên li Xezeyê ragihandin ku ji sihara duşemê û vir ve herî kêm 14 kes mirin û bi dehan kes jî winda ne. Şahidan diyar kir ku bi hezaran kesan hewl dan birevin başûr, lê ji ber ku rê asê man, gelek kes neçar man şevê li kolanan derbas bikin.
KATZ: XEZE DIŞEWITE
Wezîrê Parastinê yê Îsraîlê Katz anî ziman ku ew ji operasyonê memnun in.
Katz li ser platforma medyaya dîjîtal X’ê wiha got, “Xeze dişewite. Tsahal li binesaziyên terorîst dixe. Leşkerên me ji bo berdana dîlgirtiyan û têkbirina Hamasê, bi lehengî şer dikin.”
Wezîr ev tişt jî got, “Heta ku wezîfe temam dibe, em ê paşde gav neavêjin.”
OPERASYONA QONAX BI QONAX
Li gorî du çavkaniyên Îsraîlî yên ji CNN’ê re axivîn, tevgera bejahî li Xezeyê wê qonax bi qonax were meşandin.
