Rayedarên dewleta Tirk a dagirker bi nêzbûna hilbijartinên şaredariyan ku wê 11’ê Hezîranê bê kirin, gef û êrîşên xwe yên li dijî herêmê zêde kir.
Dewleta Tirk duh bi balafirên bêmirov û yên biçek êriş kantona Cizîrê kir. Di encamê de 4 şervanên Hêzên Sûriya Demokratîk (QSD) şehîd bûn û 12 şênî jî birîndar bûn.
Li hember van êrîşan û gefan hêrsa gel zêde bû ku Meclisa Giştî ya taxên Şêxmeqsûd û Eşrefiye ya Helebê, Meclisa Rêveber a Kantona Reqayê, Konfederasyona Rêxistinên Civaka Demokratîk a kantona Reqayê, Însiyatîfa Gel a bajarê Amûdê û Meclisa Rêveber a kantona Efrîn û Şehbayê daxuyaniyên hevbeş dan.
Di daxuyaniyan de êrişên dewleta Tirk a dagirker ên li dijî herêmê hatin şermezarkirin. Her wiha bang li gelê herêmê hate kirin ku xwedî li hêzên leşkerî derkevin ji bo ku destkeftiyên şehîdan werin parastin.
Di daxuyaniyan de hate destnîşankirin ku dewleta Tirk bi van êrîşan dixwaze prosesa hilbijartinan asteng bike ku herêm di qada siyasî de bi pêş ketiye û kêm maye Rêveberiya Xweser di aliyê navneteweyî de bê naskirin.
Di daxuyaniyan de bang li rêxistin û desteyên cîhanê yên têkildarî mafên mirovan hate kirin ku erkên xwe yên mirovî bînin cih û êrîşên dewleta Tirk a dagirker ên li dijî xebatkarên qada mirovî û xizmetguzariyê rawestînin.
