Mijara perwerdeyê, bernameya wê û materyalên ku dê werin amadekirin, yek ji xalên girîng ên Peymana 29`ê Çileyê ye. Nîqaş û gotûbêjên li ser mijarê yên di navbera Şam û rêveberiya Rojava de berdewam dikin. Lê di rojên dawîn de navên dibistanan jî ketine rojevê.
Piştî Şoreşa 19’ê Tîrmehê û avakirina sîstema Rêveberiya Xweseriya Demokratîk a Bakur û Rojhilatê Suriyeyê, li herêmê pergala perwerdeyê guherî. Navên dibistanan ku di dema rejîma Baasê de hatibûn lêkirin jî hatin guhertin û navên têkoşerên ku di şerê li dijî DAIŞ’ê de şehîd bûne, lê hatin danîn.
Li gel Peymana 29’ê Çileyê, hikumeta demkî dixwaze navên dibistanan dîsa biguherîne. Li gorî agahiyan hikumetê pêşniyar kiriye ku navên zanyar, wêjevan û rewşenbîrên Kurd li dibistanan bên kirin.
Li hemberî vê nêzîkahiyê, xwendekar, mamoste û malbatên şehîdan bertek nîşan dan û ev demek e jî çalakiyan li dar dixin.
LÎSTEYÊN ŞAMÊ Û HERÊMÊ
Li gorî hin agahiyên ku me ji çavkaniyan saziyên perwerdeyê wergirtine, ji bo navên dibistanên li bajarê Qamişlo wezaretê lîsteyek ji Rêveberiya Dibistanan a bajar re şandiye, lê rêveberiyê lîsteya ku Wezareta Perwerdeyê ya hikumetê şandiye, red kiriye û wan jî lîsteyek şandiye Şamê.
Rêveberiyê di lîsteya navên dibistanan de, hin guhertin çêkirine, lê navên hinek dibistanên ku di dema rejîma Baasê de navên hin kesayetên Kurd û Ereb lê hatibûn kirin, wekî xwe hiştine.
NAV DÎSA GUHERTIN
Mijara navan hîn tê gotûbêjkirin û nehatiye zelalkirin. Lê di vê navberê de li bajarên wekî Qamişloyê ezmûnên xwendekarên dibistanên girêdayî hikumetê dê werin çêkirin (Ezmûnên refên 9 û 12’an dê 4’ê Hezîrên dest pê bikin). Wezareta Perwerdeyê ji bo vê yekê lîsteya navên dibistanên ku dê ezmun lê werin çêkirin şandiye. Lê navên dibistanan dîsa hatine guhertin.
Li bajarê Qamişlo navê Dibistana Şehîd Diyar wekî “Esed El-Dîn Şêrko”, navê Dibistana Şehîd Şervan, wekî “Şeref Xan El-Bedlîsî-2”, navê Dibistana Şehîd Ferhad Kat wekî “Hitîn” (di dema rejîma Baasê de heman nav bû), navê Dibistana Hesen Mehmûd Xelef wekî “Eqebe Bin Nafii” guhertine.
RÊVEBERÎ DÊ DÎSA RED BIKE
Tê gotin dê Rêveberiya Dibistanan a Qamişloyê vê lîsteyê jî red bike û bersiva xwe bide. Li aliyê din nerazîbûna xelkê herêmê ya li beramberî guhertina navên dibistanan berdewam dike.
