Daxuyaniya Navenda Ragihandin û Çapemeniyê ya Hêzên Parastina Gel (HPG-NRÇ) bi vî rengî ye:
“Hevrêya me Zenda 9’ê Sibata 2020’î li Herêmên Parastinê yên Medyayê şehîd bû
Weke hevrêyên wê, em soz didin ku têkoşîna hevrê Zenda ji me re hiştiye, bi têgihiştina ku di şexsê wê de hêjayî hemû şehîdan bibin em ê bigihînin serketinê. Bi van hestan di serî de ji malbata hêja ya hevrêya me Zenda em sersaxiyê ji tevahiya gelê me yê Kurdistanê yê welatparêz re dixwazin.
Agahiyên li ser nasnameya hevrêya me Zenda Bermal a şehîd bû, bi vî rengî ne:
|
|
Nasnav: Zenda Bermal |
Hevrêya me Zenda ku bi eslê xwe ji Kerboran a Mêrdînê ye, weke endameke ji malbateke welatparêz a neçar ma koçî Fransayê bike, ji dayik bû. Li gel ku neçar ma dûrî Kurdistanê mezin bibe, bi nirxên xwe yên Kurdîtiyê meizn bû. Hevrêya me hîn bû ku malbata wê ji ber zextên dijmin ji Kurdistanê koç kiriye, ji ber vê yekê jî li hemberî dewleta Tirk bû xwedî hêrseke mezin. Bi hesreta Kurdistanê û hişmendiya welatparêziyê ya kûr mezin bû, bû xwedî wê şensê ku Partiya me zû nas bike. Hevrêya me her tim jiyana modernîteya kapîtalîst dixist ber lêpirsînê, ji Têkoşîna Azadiyê ya Kurdistanê gelekî hez dikir û ji bo bersivê ji nakokiyên xwe re bibîne materyalên Partiyê yên peyda dikir, dixwend. Weke ciwaneke Kurd a bi rûmet û welatparêz qebûl nekir ku bêdeng bimîne û xwest, tevkariyê li têkoşîna li Kurdistanê bike, lewma kete nava lêpirsînên kûr. Hevrêya me biryar da ku beşdarî nava karên jin ên ciwan bibe û di demeke kurt de bi jêhatî û çalakbûna xwe karekî serketî kir. Hevrêya me derfet dît ku tevgera me hîn baştir nas bike, ji aliyê rêxistinî ve jî bû xwedî danheviyê. Li gel ku di kar de serketî bû, ti carî xwe têr nedît, her tim a herî baş ji xwe re kir armanc û daxwaza xwe ya têkoşînê mezin kir. Hevrêya me demeke dirêj karên jin ên ciwan meşand û bû heyrana xeta jin a azad. Piştî ku li Parîsê di 9’ê Çileya 2013’an de Sara, Rojbîn û Ronahî bi namerdî hatin qetilkirin, gelekî bi hêrs bûn. Têkiliyên xwe yên bi sîstema kapîtalîst re qut kir û gihîşt biryardariya meşandina têkoşîneke hîn bi bandor. Di demekê de ku êrîşên çeteyên DAÎŞ’ê zêde bûn, kete nava lêgerîna tevlîbûna li nava refan. Hevrêya me şahidî ji wê yekê re kir ku milîtanên fedaî yên Apoyî li hemberî hemû êrîşan gelê me diparêzin, di vê oxirê de berdêlên giran didin. Lewma dest ji xwendina zanîngehê berda û biryar da ku tevlî nava refên partiya me bibe.
Hevrêya me di sala 2014’an de tevlî nava refên Têkoşîna Azadiyê ya Kurdistanê bû û berê xwe da warê gerîla. Hevrêya me zanîbû ku yekane cihê karibe bersivê ji lêgerînên xwe re peyda bike çiyayên azad e, lewma xwegihandina çiyayê azad ji bo xwe weke xwebûnê dît. Hevrêya me di demeke kurt de hînî jiyana li çiyê bû û beşdarî nava perwerdeyên bingehîn ên gerîla bû. Bi dilxwaziya xwe ya hînbûnê û tevlîbûna xwe ya bi kelecan bû namzeteke mînak a gerîla. Bi tevlîbûna xwe ya cewherî, jiyana xwe ya sade, dilnizm û kedkar li nava hevrêyên xwe hemûyan bû cihê hezkirinê. Hevrêya me wateyeke xurt da rêwîtiya xwe ya ji Ewropayê ber bi çiyayên Kurdistanê û têkiliyeke xurt bi Rêber Apo re danî, bi vî rengî perwerdeya xwe bi serketî qedand. Li qadên pratîkî di demeke kurt de bû xwedî tecrûbeyên li ser jiyana gerîla, ji bo ji aliyê îdeolojîk ve xwe kûrtir bike beşdarî nava perwerdeyên akademiyê bû. Hevrêya me dixwest di mijara Îdeolojiya Azadiya Jinê de xwe kûr bike, bibe pêşenga civakên jinên azad û di pêvajoya perwerdeyê de kete nava kûrbûnan. Parêznameyên Rêbertî yên ku dixwend di nava jiyanê de bi hevrêyên xwe re parve dikir, bi vî rengî tevkarî li pêşketina hevrêyên xwe dikir û ji bo felsefeya Apoyî bikeve meriyetê ked da. Piştî ku perwerdeya xwe qedand beşdarî nava karên stratejîk bû, bi xwezayîbûn, durustî û tevlîbûna xwe ya bêteredût a li têkoşîna azadiyê her wezîfe bi rengekî hêja bi cih anî.
Têkoşîna xwe ya ji Parîsê heta çiyayên Kurdistanê her roj mezin kir, bû xweedî têkoşîneke bê navber û bi vî rengî hevrêya me Zenda bû gerîlayeke YJA Star a serketî. Hevrêya me xwe tevlî çiyê, hevrêyên xwe û têkoşîna jinê ya azad kir û pêwîstiyên nasnameya YJA Starê bêkêmasî bi cih anî. Hevrêya me cewhera jinê ya azad û bedewiya wê nas kir. Di 9’ê Sibata 2020’î de li Herêmên Parastinê yên Medyayê şehîd bû. Hevrêya me Zenda lêgerîna xwe ya azadiyê ji bo kêliyekê jî nesekinand û li çiyayên Kurdistanê xwe ji nû ve afirand. Em ê xwedî li bîranîna hevrêya xwe derkevin, wezîfeyên ku wê ji me re hiştiye, di şexsê wê de bi hişmendiya hêjabûyîna ji hemû şehîdan re em ê bi cih bînin.”
