Hêzên Parastina Jinê yên Rojhilatê Kurdistanê (HPJ) bi wesîleya salvegera 3’emîn a şoreşa ‘Jin, Jiyan, Azadî’ daxuyaniyek da û şehîdên şoreşê hemû bi bîr anî û soza serketinê careke din dubare kir.
Di destpêka daxuyaniyê de hate gotin, “Rastiya mirovahiyê di van axên ku jinê çêkiriye de, bi awayekî zelal bi hemû dijwariya xwe ve, tê jiyan kirin. Di ronîkirina pergala mêrê serdest û rastiya dewlet-desthilatdariyê de, tevgerên azadiya jinê, xwedî rolên girîng in. Hişmendiya azadiya jinê û ezmûnên têkoşîna bi rêxistinî, hişt ku tevgera jinê li hemû cîhanê bilind bibe û ji têkoşîna li dijî pergalê re pêşengtî bike. Peyamên bingehîn ên ku bi milyonan jinan di vê çalakiyê de qîriyan, redkirina pergal û jiyîna heyî bû. Dewlet, serdestiya mêr û kapîtalîzm protesto kirin. Bi qasî guhertina pergala heyî, vebijêrka azadiya jinê danîn holê. Silogana ‘JIN PÊŞEROJ E’ îfadeya vê yekê ye. Rejîmên dîktator ên ku di dused salên dawiyê li herêmê serwer in, têkoşîna maf û azadiya jinan, di sînorên ku dewletê diyar kiriye de, nirxandine. Kes, rêxistin û saziyên ku ji vê çarçoveyê derketine, bi kiryar û zextên cidî re rû bi rû mane, destûr ji pêşketina wan re nehatiye dayîn. Xebatên jinan di bin kontrola dewletê de pêş dikevin. Em mînaka vê di êrîşa ku 13’ê Îlonê de, li ser keça Kurd Jîna Emînî û beriya wê Şilêr Resûlî de dibînin. Bi mafên sînordar ên ku piraniya wan li ser kaxezan dimînin re hatiye xwestin ku jin bibin, jinên herî baş ên malê û xizmetî polîtîkayên netew-dewletê bikin. Di nava sîstema ku rejîma Îranê wê bi rêve dibe de, propaganda tê kirin ku Îran pir bi awayeke baş nêzî jinan û meseleya jin dibe.”
‘ŞOREŞA JINÊ MIJARE HEBÛNÎ YE’
Daxuyaniya HPJ’ê bi vî rengî dewam kir:
“Li hember vê pergalê, di sedsala 21’emîn de xwe parastin, di serî de ji bo jinan, ku di hedefên nexşeya Modernîteya Kapîtalîst de ne, bûye pêwîstiyeke jiyanî ya nebe nabe. Di pêşxistina vê hişmendiyê de, bandoreke pir girîng a tevgera azadiyê heye. Xwe parastin, di wateya fireh de xwe dispêre parastina xwe, nirxên xwe, rûmeta xwe, destketiyên xwe. Ji ber vê jî, şoreşa jinê mijareke hebûnî ye. Dewlet û mêr bi rêbazên tundiyên fîzîkî, psîkolojîk, zayendî, ekonomîk û devkî hewl dide jinan bê parastin bigire û bihêle. Jinan di mijara mêrsalarî, serdestiya mêr û faşîzmê de, bi zana kirin, lê li gel vê jî, stratejiyên ku li hember wan karibin xwe biparêzin jî fêr kirin jiyanî ye. Ji parastina takekesî, heta parastina bi rêxistinî, ji parastina legal heya ya îlegal, hem wekî artêşbûn û hem jî wekî yekeyên xwe parastinê, pêwîstî bi fikirandin, rêxistinbûn û çalakîkirinê heye. Pêşxistina îrade û rêxistinbûna ku wê li dijî tundiyê bisekine, hîmên înşaya nasnameya jin a li ser bingeha azadiyê ava dike. Di ezmûna tevgera azadiya jin a Kurdistanê de, gava yekem a fikir, çalakiya azad û rêxistinbûna xweser, bi artêşbûna jinê re hat avêtin. Bi qasî ku asta azadiya jinê bilind kirin, bi jiyan û çalakiyên xwe re serdestiya mêr hilweşandin.
Xwe parastin divê bûyîna hêza parastina şoreşa jinê, ji xwe re bikin armanc û hîn bêhtir xwe rêxistin kirin û bi hêzbûnê dayînin pêşiya xwe. Divê karibin hedefên ku ceribandinên wekhev ên cîhanê bandor dikin, piştgirî didin wan, zanyariyên ceribandinan bi hevdu re parve dikin, rêxistinbûnên hevpar ava dikin, ji xwe re diyar bikin.
BERXWEDANA JINAN LI ÇIYÊ Û ZINDANAN DEWAM DIKE
Berxwedana jin a ku temsîla xwe di Zîlan Pepûle, Madûra, Şêrîn Elemhûlî, Aryen Arê de dît, li çiyayan û zindanan berdewam dike. Di Rojhilatê Kurdistanê de rêbazên şerê taybet, ên li dijî jinan pir zêde tên bi kar anîn. Li gel vê potansyaleke pir xurt a jina şoreşger heye. Bi hêza parastinê HPJ, rêxistinbûna jin a di xweparastinê de, hewl tê dayîn ku ev potansyal bê bi rêxistin kirin. Jinên Fars, Belûc, Afxan û Azerî yên ku pirsgirêkên giran ên civakî û komkujiyên jinan dijîn, xwedî li wan derkevin û biparêzin. Ji xwe ev potansyal xwe di serhildanên JIN JIYAN AZADÎ de, ku mohra xwe li sala 2022’an da û belavî tevahî cîhanê bû de, derxist holê. Pêşketina serhildanan li Rojhilatê Kurdistanê ku xwedî çandeke komînalîzmê û jinên bi hêz e, di asta raperîneke şoreşa jinê de bû. Serhildanên ku bi Şilêr Resûlî û Jîna Emînî dest pê kiriye, bi dirûşmeya JIN JIYAN AZADÎ mezin bû, bandora xwe jî li ser hemû cîhanê kir. Serhildanên ku bi qetilkirina Jîna Emînî dest pê kir, li tevahî cîhanê formîla Rêbertî ya bi sihir a JIN JIYAN AZADÎ, weke silogan û felsefeya şoreşeke jinê, bi nav û deng bû. Her çendî gelek aliyan xwestin ku vê siloganê bikin malê xwe, hinekan xwestin li şûna wê siloganên din berz bikin jî, ev hewldanên wan bi ser neketin. Şoreşa JIN JIYAN AZADÎ, ji bo tevahî cîhanê bû hêviyeke şoreşê.
BER BI CIVAKA DEMOKRATÎK Û AŞTIYÊ VE GAVÊ BIAVÊJIN
Em weke hêzên HPJ erk û berpirsyartiyên vê şoreşê bi cih bînin, wekî hêza pêşeng xwedî li nirxên şoreşê derbikevin. Soza tolhildanê careke din nû dikin û bang li hemû jinan dikin ku bi silogana JIN JIYAN AZADÎ, ber bi civaka demokratîk û aştiyê ve gav bavêjin û berxwedana jinan veguherînin şoreşa jinan.”
