Meclisa Kombûna Jinan a Zenûbiya ya kantona Reqayê di çarçoveya pêngava “Bi hevgirtina jinan em ê Sûriyeyeke azad, demokratîk û nenavendî ava bikin” de ku 12’ê Cotmehê dabû destpêkirin, civîneke berfireh ji jinan re li dar xist.
Civîn li Hola Werzîşê ya stadyuma bajarê Reqayê bi beşdariya nûnên komîteyên jinan ên saziyên sivîl, Hêzên Ewlekariya Hundirîn-Jin, Kombenda Efrînê ya Civakî û nûnerên partiyên siyasî hat lidarxistin.
Di civînê de hevseroka Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehmed rewşa siyasî nirxand.
Îlham Ehmed anî ziman ku Sûriye di dîroka xwe ya siyasî û civakî de ji pêvajoyeke girîng re derbas dibe, divê mafên tevahî pêkhateyên neteweyî û olî werin mîsogerkirin û çareseriyeke siyasî ya demokratîk were dîtin ku nenavendîbûnê, edaleta civakî û wekheviyê pêk bîne.
Îlham Ehmed destnîşan kir ku nenavendîtî projeyeke parçebûnê nîn e, mîna ku hinek îdia dikin, lê projeya yekbûyîna hêzan û mîsogerkirina nûnertiya adilane ya tevahî pêkhateyên Sûriyeyê ye. Her wiha da zanîn ku ezmûnên cîhanê îsbat dikin ku pergalên federal û konfederal û nenavnedîtî rêya pêkanîna pêşketin û îstîqrara siyasî û aborî ye.
Îlham Ehmed di dewama axaftina xwe de diyar kir ku nenavendîtî tê wateya temsîla adilana ya jinan di navendên biryardanê de, parvekirina serwetan bi awayekî adilane li parêzgehan û pêşxistina aboriyê, parastina pirrengiya çandî ya pêkhateyan.
Îlham Ehmed bal kişand ser pirsgirêkên li hemberî jinan û şerê taybet ê li hemberî wan tê meşandin û got: “Bi rêya medyaya dîjîtal şerekî derûnî li hember jinan dimeşînin da ku îradeya wan têk bibin û destkeftiyên wan biçûk bixin. Êrîşên li ser rûmeta jinan û malbatên wan karekî derexlaqî ye. Armanc ew e ku meşa azadiyê ya jinan bidin sekinandin. Lê em jin dê têkoşîna xwe bidomînin û bi zanebûn û israreke mezin li hemberî van êrîşan rabin.”
Hevseroka Daîreya Têkiliyên Derve di dewawa nirxandinên xwe de behsa dan û standinên di navbera nûnerên Rêveberiya Xweser û hikumeta veguhêz a Sûriyeyê de kir û diyar kir ku dan û standinên di atmosfereke erênî de derbas dibin û got: “Armanc em bigihêjin lihevkirinên rasteqîn li ser siberoja Sûriyeyê û saziyên rêveberî û leşkerî ku beşdariya rasteqîn a hemû pêkhateyên mîsoger bike.”
Îlham Ehmed îşaret pê kir ku entegrekirina Hêzên Sûriyeya Demokratîk di nav artêşa Sûriyeyê de wek gaveke yekem ber bi avakirina artêşeke neteweyî ya yekgirtî ve ye ku hemû sûriyeyiyan bê cudahî diparêze û got divê temsîla Bakur û Rojhilatê Sûriyeyê di saziyên hikumetê de rasterast be.
Îlham Ehmed bal kişand ser pirsgirêka koçber û penaberan jî û da zanîn ku divê vegera koçber û penaberan bi garantiyên ewle be ku jiyan û milkên wan biparêze. Her wiha dagirkeriya Tirk a li Efrîn, Şehba, Girê Spî û Serêkaniyê û siyasetên tirkkirinê şermezar kirin.
Hevseroka Daîreya Têkiliyên Derve eşkere kir ku eger Tirkiye di niyeta xwe ya pêkanîna aştiyê de durist be, Rêveberiya Xweser ji diyalogên re vekirî ye û ev li gotinên xwe zêde kir: “Em teqez dikin ku îstîqrara Sûriyeyê tê wateya îstîqrara Tirkiye û tevahiya herêmê. Em dixwazin têkiliyên me bi welatên derdorê re li ser esasê aştiyê bin, ne li ser esasê dagirkerî yan dûrxistinê bin.”
Îlham Ehmed di dewama axaftina xwe de got sîstema navendî ya ku hikumeta veguhêz li ser wê israr dike, pêşketinê asteng dike û pirsgirêkên aborî di navbera parêzgehan de derxe. Îlham Ehmed bang kir ku divê raye werin parvekirin û roleke mezin bidin rêveberiyên xwecihî di dayîna biryaran û peydakirina xizmetan û dabînkirina derfetên kar de.
Her wiha Îlham Ehmed got Rêveberiya Xweser, Sûriyeyeke demorkatîk, nenavendî û pirreng dixwaze ku ku mafên jinan û hemû neteweyan tê de werin parastin û wiha bi dawî kir: “Em di wê baweriyê de ne ku aştî û edalet rêya bidawîkrina êşên sûriyeyiyan, bi taybetî yên jinan e. Ji ber ku yên herî zêde ji ber şeran mexdûr bûn, jin in. Tevî vê yekê jin di avakirina aştî û siberojeke baştir ji bo tevahiya Sûriyeyê de, bi israr in.”
